بِسْمِ اللهِ الرَّحْمٰنِ الرَّحِيمِ
Саудиянинг гольф ўйинига нисбатан алоқасининг сири!
Устоз Аҳмад Хутвоний
Яқинда Саудия Арабистони унчалик урф бўлмаган ва умуман минтақа халқларида оммалашмаган янги спорт турнири – гольф турнирини жорий қилди. Саудия бу ўйинни қўллаб-қувватлаш ҳамда уни молиялаштириш учун вақти-вақти билан 100 миллион доллар ажратиш мажбуриятини олди.
Бу ғалати хабарни синчиклаб ўрганиш натижасида гольфга оид сир ортида собиқ АҚШ президенти Дональд Трамп тургани аниқланди. Трампнинг ўзи буни эътироф этди, яъни унга кўра, гольф ташкилоти саудияликларнинг миллионлаб долларига муҳтож бўлган ва бунинг эвазига Трамп Салмонни тахтдан йиқилишидан ҳимоя қиладиган бўлган, ўз навбатида, Салмон ушбу серхаражат ўйинни ҳимоя қилиш мажбуриятини ўз зиммасига олган. Демак, бу Саудлар хонадони ҳукмдорларига нисбатан Американинг янги шантажларидан биридир. Дарвоқе, буни ҳам Трамп қуйидагича изоҳлади: «Мен билган бойларнинг пули чекланган, қолган ҳаётлари учун 100 миллион доллар сарфлашни исташмайди. Аммо саудиялик бойлар бу масалада пул аяшмайди, уларнинг чўнтаклари жуда чуқур… Саудия гольфни севади».
Бундай бачкана турнирни жорий қилган Саудия энди унинг мусобақаларига миллионларни сарфлайдиган бўлди. Зотан, ўтган июл ойида ташкил этилгандан бери мусобақалар учинчи мартасига етиб келди. Гольфнинг машаққатли кўплаб турлари «Live Golf Invitational», деб номланиб, унда «Bed Minster» номи остида Трамп клуби ҳам иштирок этади.
Саудия гольф турнирини молиялаш билангина кифояланмади, балки Уммон мамлакатида «Dar Al Arkan Real Estate Development Company» (Дорул Акон Ривожланиш компанияси) орқали йирик гольф лойиҳасини барпо этиш учун Трамп ташкилоти билан 1.6 миллиард долларлик шартнома имзолади. Лойиҳа 3500 уй-жой, гольф ўйингоҳлари, 450 хонали иккита меҳмонхона ва курортлардан иборат.
Ушбу шартноманинг имзоланиши Трамп 2024 йилги сайловларда президентлик лавозимига расман ўз номзодини эълон қилган пайтга тўғри келди.
Муҳаммад ибн Салмоннинг Трамп клуби ва ташкилотига бундай саховатпешалик билан сарф-харажат қилганлиги фақат битта маънони ифодалайди: Ибн Салмон икки йилдан кейинги президентлик сайловлари кампаниясида Трампни қўллаб-қувватламоқда ҳамда сайлов кампаниясида Республикачилар партиясининг энг йирик ҳомийларидан бири Саудия бўляпти, бу билан у гўё АҚШдаги сайлов ўйинларининг бир қисмига айланди.
Саудия Трамп ва партиясига ҳамда Саудия билан битим тузган АҚШ компанияларига шундай сахийлик қилгандан сўнг, табиийки, Америка маъмурияти Муҳаммад ибн Салмонни ҳуқуқий дахлсизлик билан таъминлайди, жумладан, уни келажакда қонуний таъқиб қилмаслик ва журналист Жамол Ҳошақжийнинг ўлдирилиши учун жавобгарликка тортмаслик каби.
Кимдир, ҳозирги президент Байден ва Демократлар партиясига Саудиянинг айни ҳомийлигининг фойдаси йўқ, бу Трамп ва партиясига тегишли, бас, шундай экан, нега Байден маъмурияти Ибн Салмонга дахлсизлик берсин? – деб сўраши мумкин. Бунга жавобни Америка сайловлари характеридан топамиз. Гап шундаки, Америка сайловларида ҳомийларга ҳар икки партияни молиялаштиришга рухсат берилади. Чунки гап Трамп ва партияси ҳам эмас, Байден ва партияси ҳам. Йўқ, балки ҳамма гап Америка ва партияларидир. Саудия гольф турнирига йирик миқдорда пул бераётган экан, бундан фақат Трамп фойдаланмайди. Балки АҚШ компаниялари, америкалик ўйинчилар ва ҳатто АҚШ давлати ҳам фойдаланади. Шунинг учун бу ерда Ибн Салмонни шантаж қилаётган Америкадир. Бу эса, Америка давлатчилигига катта молиявий тушим келтиради. Шу боис, уни қабул қилмасликка мутлақо ўрин йўқ.
Шундай қилиб, демак, Ибн Салмон мусулмонлар молини мана шундай бемаъни ўйинларга исроф қилмоқда. Бу Американинг манфаатларидан бошқа нарсага хизмат қилмайди. У мамлакатда ҳеч кимга фойдаси тегмайди, балки Ибн Салмонга тахтини сақлаб қолишига ва қора рўйхатдан номини ўчириб олишига ёрдам беради. Маълумки, қора рўйхат яшириш мушкул бўлган аниқ жиноят содир этгани учун Америка томонидан қидирувга берилган шахсларни таъқиб қилиш мақсадида тузилган.
Агар Ибн Салмон бу пулларни реал саноат бунёд этиш ва инсонларнинг асосий эҳтиёжларини қондиришга сарфласа, ўз мамлакатининг муҳим инфратузилмаси ва объектларига жиддий сармоя сифатида ётқизса, шубҳасиз, Саудия мустақил давлатгина эмас, ҳатто йирик давлатга айланган бўлур эди. Ёки бу каби пулларни камбағал мусулмонларга улашса эди, ер юзида битта ҳам камбағал қолмаган бўларди.
Бироқ, Ибн Салмоннинг бу маблағларни фақат ажнабий ўйинчилар фойдаланувчи гольф ўйингоҳлари ва меҳмонхоналарига сарфлаётгани Уммат душманларидан бошқасига хизмат қилмайди. Бу маблағлар душманга хизмат қилиши билан бирга, саудлар режимини дунё олдида кулгига айлантиряпти. Ҳамма бу кимсанинг мамлакат пулларини буткул тентаклик ва бачканалик билан исроф қилиб, бировларга совураётганини гапирадиган бўлиб қолди.
Роя газетасининг 2022 йил 7 декабр чоршанба кунги 420-сонидан
