بِسْمِ اللهِ الرَّحْمٰنِ الرَّحِيمِ
Ғазонинг собит туриши ҳамда сиёсий эксплуатациянинг хатари
Устоз Аҳмад Хутвоний қаламига мансуб
Ғазонинг мард аҳли яҳудий вужудининг ваҳший ҳужумлари қаршисида собит турдилар. Бу эса, мусулмонларнинг келажакда Уммат маъракаларида куфр кучларига ва тажовузларига қарши энг йирик жангларга ҳам киришга қодир эканини кўрсатди. Бу мардлик бир тарафдан тиш-тирноғигача қуролланган ва янги турдаги арсеналларга эга бўлган яҳудий вужуди армияси томонидан қамал қилинган, нариги Синай томондан эса, Сисий режими томонидан қуршовга олинган бир парча ерда кўрсатилди.
Ғазонинг бу мумтоз собитлиги-мардлиги қуйидаги икки ҳақиқатни келтириб чиқарди:
- Босқинчи яҳудий вужудининг заиф ва нимжонлиги ҳамда уни муқаррар қаттиқ мағлубиятга учратиш мумкин экани.
- Мусулмонларда оз имконият билан ҳам энг йирик давлатлар устидан ғолиб келишга қодир улкан яширин қудратнинг борлиги.
Ғазо секторидаги ҳарбий етакчилик босқинчи давлат ҳарбий кучларининг зулму зўравонлигига қарши туришда муваффақият қозонди. Ўз навбатида, бу муваффақият ушбу етакчилик зиммасига ўша қўлга киритган ютуқларига муносиб бирор таъсирли сиёсий ишларни қилиш вазифасини юклади.
Сиёсий ишлардаги эксплуатациянинг икки тури мавжуд:
- Давлатлар ва ҳукуматларнинг эксплуатацияси;
- Халқлар ва ташкилотларнинг эксплуатацияси.
Бу икки эксплуатация ўртасида улкан жарлик бор. Шу сабабли уларнинг ўртасини бирлаштириш қийин, ҳатто имконисиз, дейиш мумкин. Чунки улар ўртасида катта келишмовчилик бор.
Гап шундаки, бугунги кунда барча давлатлар ва ҳукуматлар Исломга ва мусулмон халқларга душман. У ерлардаги барча ҳукмдорлар мустамлакачиларга ёлланган бўлиб, малай ва сотқинлик қилишмоқда. Уларнинг бирини иккинчисидан яхши деб бўлмайди, ҳаммасининг лойи ва зуваласи битта, ҳеч бирига ишониб бўлмайди.
Миср Форс Кўрфази давлатларидан, Туркия эса, Эрон ва Покистондан фарқ қилмайди, ҳаммасининг мусулмонлар масаласида тили бир. Ўзларини дўст, деяётган давлатлар ўзларини қаршилик, деб атаётган давлатлардан фарқ қилмайди. Хиёнат ва малайликда бу давлатлар етакчилигининг бошқа давлатлар етакчилигидан фарқи йўқ, фақат ном ва шиорлари бошқача, холос.
Шунинг учун, ўз ҳарбий қаҳрамонлигини эксплуатация қилган ҳолда амалга оширган Ҳамас етакчилигининг энг ёмон иши Эрон ва Сурия каби «қаршилик меҳвари», деб аталаётган давлатлар ҳукмдорларига мақтовлар ёғдириши бўлди. Бу давлатлар ўз армиялари билан Сурия аҳлини сўйиб қонини ичганига, миллионлабини азоб-уқубатларга ташлаб, ўз юртларидан қочқинга айлантирганига, уй-жойларни аҳолиси билан қўшиб ер билан яксон қилганига қарамай, Ҳамас етакчилиги уларга мақтовлар ёғдирди.
Ҳамас раҳбарлари содир этган хатолар ичида энг даҳшатлиси уларнинг Фаластин маъмуриятига яқинлашиш билан боғлиқ сиёсий эксплуатацияси бўлди. Ҳолбуки, босқинчи яҳудийлар томонидан Ғазо агрессия қилинган пайтда бу маъмурият яҳудийлар билан елкама-елка туриб, босқинчиликка қарши ўтказилган барча намойишларни бостириш билан шуғулланди.
Яқинда Фатҳ ҳаракатидан ажралиб чиққан Носир Қудва ўз баёноти билан маъмуриятнинг кимлигини очиб қўйди. У Фаластин маъмурияти вазифаси фақат босқинчи давлат билан хавфсизлик мувофиқлашувига чекланмайди, балки у айни мувофиқлашувидан бир мунча катта вазифалар билан шуғулланади, масалан, Фаластин маъмуриятига қарашли хавфсизлик гуруҳлари ҳарбий амалий таълимотни тўғридан-тўғри босқинчи армиядан олади, деди.
Демак, Фаластин режими хавфсизлик соҳасида том маънода босқинчи режимга айланди, у билан муомала қилмоқ босқинчи билан муомала қилмоқни англатади. Шунинг учун, Ҳамаснинг вазифаси бундай режим билан муомала қилиш ўрнига, уни тахтдан йиқитиб, бутунлай йўқ қилишдан иборат эди. Зеро, Ҳамаснинг яқиндаги жангдан музаффар ҳолатда чиқиши ҳозирда энг заиф аҳволда турган Фаластин режимини ағдариш учун олтин фурсатдир.
Ҳамаснинг Фаластин режими билан келишиш орқали халқаро ҳамжамиятга ва Америкага яқинлашаётганига келсак, бу унга ҳеч қандай фойда келтирмайди. Аксинча, бу Ҳамасни ҳалок қилади ва келажакда босқинчи давлат билан музокара олиб бориш ботқоғига тиқади.
Холид Машъал – нима учун Америка биз билан худди Толибонга қилган муомаласини қилмаяпти, деган саволни кўтарди. Бизнинг бунга жавобимиз шуки, Америка Толибонга нисбатан заиф позицияда муомала қилди, кучли ғолиб позицияда туролмади. Толибон Американинг малайи афғон ҳукуматини тан олгани йўқ, аммо Ҳамас Маҳмуд Аббос ҳукуматини тан олди. Агар Ҳамас Фаластин маъмуриятини бойкот қилиб, тан олмаганда ва уни йўқ қилишга ҳаракат қилганда ҳамда Фаластиннинг саксон фоиз ерини ҳеч қандай эвазсиз яҳудийларга бериб юбораётган Фаластин Озодлик (таслим бўлиш ва ён бериш) Ташкилотини ҳам бекор қилганда, шунингдек, бир ташкилот эмас, бир сиёсий вужудга асос солганда эди, Америка ва халқаро ҳамжамият ҳам у билан алоқа қилган бўлур эди. Чунки Ҳамаснинг бу позицияси кучли позиция бўлган бўларди ва Америка у билан музокара қилишга мажбур бўларди, худди кучли позицияда турган ва ўзи сиёсий вужуд ҳисобланган Толибон каби.
Тўғри, Толибон ҳаракатининг Америка билан музокарага ўтиргани жуда катта сиёсий хатодир, буни ҳеч ким инкор этмайди. Бироқ, Толибоннинг бу хатоси Ҳамаснинг хатоси билан тенг эмас. Чунки Ҳамас малай бир режим билан сулҳга келишди ва шу келишуви билан янада заифлашди, шунча топган ютуқларини бир пул қилди.
Ҳамас ҳаракатининг яқиндаги Ғазо уруши ортидан ўз сиёсий эксплуатацияси орқали содир этган учинчи улкан хатоси унинг тоғут Сисий режими билан ҳамкорликни оширгани бўлди… Ахир Сисий режимига умуман ишониб бўлмайди ва буни Ҳамаснинг ўзи бошдан ўтказган… қанча-қанча хиёнатлари, жиноятлари ва сотқинликларини кўрган. Минг афсуски, шу кунларда мана шу тоғут Сисийнинг сурати Ғазо кўчаларига илиб қўйилди. Ҳолбуки, Мисрдаги «Робиатул адавий» қирғинини содир этган ва Ихвон ҳокимиятини ағдарган, ҳамон мисрликлар бошида зулму зўравонлик билан ўтириб, улардан ўч олаётган мана шу Сисий режими бўлса!
Ҳамаснинг сиёсий эксплуатация орқали йўл қўйган хатолари бор-бора ўзини заифлаштириб, Фатҳ ҳаракати билан режимни кучайтиради. Малай режимни у билан бўйлаша оладиган даражага кўтаради. Ваҳоланки, ҳали ҳам кеч эмас, Ҳамас олдида бу режимдан буткул қутулиш имконияти бисёр.
Мана шундай хатолар сабабли анави Башар Асаднинг қабиҳ юзи чиройли қилиб кўрсатилди ҳамда эронлик ҳукмдорларнинг Шом диёрларидаги нуфуз ва жиноятлари янада кучайди.
Бу хатоларнинг яқиндагиси сабабли Сисий режими Ғазодаги ўзининг нуфузини кучайтиришда қонуний баҳонага эга бўлди.
Тўғри ва ҳақиқий сиёсий эксплуатация фақат халққа чекланади, ундан нарига ўтмайди. Бу – нусрат ютуқларини доимий ҳимоя қиладиган халқ базаси асосидаги ягона эксплуатациядир.
Роя газетасининг 2021 йил 9 июн чоршанба кунги 342-сонидан
