Атамбаев Путин билан учрашди
Путин қирғизистонликларни ҳозирги президент атрофида бирлашишга чақирди
Россия президенти Владимир Путин Кремлда Қирғизистоннинг собиқ президенти Алмазбек Атамбоев билан минтақа ва республикадаги вазиятни муҳокама қилганини маълум қилди.
“Ҳа, мен Алмазбек Шаршенович билан учрашдим. Биз минтақа ва Қирғизистондаги вазият ҳақида гаплашдик”, – деди у журналистларга.
Путин Қирғизистон учун ҳозирда сиёсий барқарорлик муҳим эканлиги, республика аҳолиси амалдаги президент Сооронбай Жээнбеков атрофида бирлашиши кераклигини айтди.
“Менинг позициям маълум. Унга (Атамбоевга) ҳам шу позицияда эканлигимни билдиргандим. Мен Қирғизистон – у бизнинг иттифоқчимиз, бизга яқин давлат, етарлича бир нечта марта, аниқроғи, камида икки марта ички сиёсий силкинишларни бошидан кечирди деб ҳисоблайман. Менимча, Қирғизистон халқи манфаати учун тўхташ лозим. Мамлакат сиёсий барқарорликка муҳтож. Ва барча одамлар амалдаги президент атрофида бирлашиши ва унга давлатни ривожлантиришда ёрдам бериши керак”, – деди у.
Изоҳ:
Атамбаевнинг Россияга бориш масаласи Путин билан Жиянбековнинг охирги учрашувида ҳал қилинган эди. Келишувга мувофиқ Жиянбеков ички сиёсий кескинлик оқибатларидан қутилмоқчи бўлган бўлса, Путин бу учрашувдан Қирғизистондаги сиёсий доира ва руспараст етакчи гуруҳни парокандага учраб (Украинадаги сингари) йўқ бўлиб кетишини олдини олмоқчи.
Атамбаев Путин билан учрашди, унинг мақсади шу эди. Путиннинг мақсади эса, Атамбаев ва унинг атрофидаги бир қатор сиёсатчиларни Қирғизистон ҳокимиятига мухолифат куч сифатида ўз таъсири остида ушлаб қолишдир. Путин шу йўл билан Қирғизистондаги сиёсий вазиятни издан чиқиб кетиши ва бунинг натижасида пайдо бўлиши мумкин бўлган сиёсий бўшлиқни ғарбпараст кучлар тўлдириб олиши мумкин бўлган хавфни олдини олмоқчи бўлади. Яъни у, Қирғизистондаги позиция ва аппозицияга оид барча сиёсий кучларни ўз таъсири остида ушлаб қолмоқчи.
Демак, Атамбаев Россияпараст сиёсий мухолиф кучлар лидери бўлиши мумкин. Ўз навбатида Жиянбеков ҳам Россияпараст ҳокимият вакили бўлиб қолаверади. Бу эса, Қирғизистон ҳокимияти рус манфаатига хизмат қилишдан бўйин товласа, мухолиф кучлар майдонга чиқарилишини англатади. Яъни Путин Қирғиз ҳокимиятини Атамбаевчи мухолифат билан доим қўрқувда ушлаб туришни мўлжалламоқда.
Лекин Россиянинг Атамбаевни зўравонларча олиб чиқиб кетиши, худди шу йўл билан Батукаевни ҳам олиб чиқиб кетганлигини исботлади. Яъни Путиндан бошқаси жиноий жавобгарликка тортилган Батукаевни ҳам ёки тортилаётган Атамбаевни ҳам, олиб чиқиб кета олмас эди, деган фикр ўз исботини топди. Россия ўзининг бу ҳаракати (ички сиёсий ишларимизга очиқ аралашуви) билан Қирғизистон президентини ҳам, ҳокимиятини ҳам, ясама мухолифотини ҳам обрўйсизлантирди. Уларнинг Кремлга мутлоқ тобе экани ва мустақиллик қалбаки фикр экани очиқ намоён бўлди. Демак парламент сайлови олдида бу ишга рози бўлиб, Россияга давлат тизгинини очиқ ушлатиб қўйган президент, ўта ночор аҳволда!
Абдураззоқ Мўъмин.