Лукашенко Россияни айблади
Беларус президенти Александр Лукашенко “Дружба” нефт қувури орқали келган ифлос нефтдан мамлакатдаги корхоналар юзлаб миллион доллар зарар кўрганлигини айтди. Бу ҳақда БелТА хабар бермоқда.
Лукашенконинг сўзларига кўра, зарар миқдорини баҳолашда бир неча омиллар ҳисобга олинади.
“Бу нефт қувури, станциялардаги насослар ва нефтни қайта ишлаш заводларига етказилган улкан зарардир”, – деди у.
Лукашенко бу воқеага Россия ҳудудидаги эътиборсизлик сабабчи эканлигини билдирди. Шу билан бирга, Беларус президентининг фикрича, Владимир Путин “зарарни қоплаш кераклигини тушунади”. Зарарнинг аниқ миқдори нефтни қайта ишлаш заводларидаги текширувлардан сўнг аниқ бўлади, деб қўшиб қўйди у.
19 апрел куни “Белнефтехим” концерни “Дружба” нефт қувури орқали Россиядан келадиган нефт сифати кескин ёмонлашганини маълум қилганди. Натижада Беларус ва қатор давлатлар Россия нефтини транзит қилиш ва қайта ишлашни тўхтатди.
