НАТО Россияга “сўнгги имконият” берди
Россия белгиланган муддат ичида “Ўрта ва кичик масофадаги ракеталарни йўқ қилиш тўғрисидаги битим” бажарилишига қайтмаса, НАТО унга тегишли жавоб қайтаради. Бу ҳақда Шимолий Атлантика альянси бош котиби Йенс Столтенберг DPA агентлигига берган интервьюсида маълум қилган.
“Муҳими, Россия ҳозирда сўнгги имкониятга эга. Агар Россия битим шартларига қайтмаса, унда биз катта муаммоларга дуч келамиз”, – дея таъкидлаб ўтди Столтенберг.
Унинг фикрича, стратегик мувозанатни тиклаш учун НАТОда Ўрта ва кичик масофадаги ракеталарни йўқ қилиш битими тўхтатилишига жавоб қайтаришнинг кўплаб усуллари мавжуд. Бироқ, у вазиятни мураккаблаштирмаслик учун тафсилотларга аниқлик киритиб ўтирмади.
“Биз жуда кескин жавоб қайтармаймиз, аммо буни қилиш керак. Бизнинг устувор вазифамиз – Россияни битимга риоя қилишга қайтариш”, – дея қайд этиб ўтди бош котиб.
Столтенберг НАТО АҚШнинг Европада икки томонлама келишувлар асосида ўз ядро ракеталарини жойлаштириши мумкинлигини истисно этиши бўйича саволга жавоб қайтармаган. Столтенбергнинг билдиришича, декабрь ойида ташкилот доирасида бу масалани ҳал қилишга рози бўлган альянс мамлакатлар ТИВ раҳбарлари қарорини олқишлайди.
Шу билан бирга, НАТО бош котибининг қайд этишича, Россияга тегишли янги SSC-8 ракеталари аллақачон Европада жойлаштирилган, улар ядровий каллакни олиб юриши ҳамда Ўрта ва кичик масофадаги ракеталарни йўқ қилиш тўғрисидаги битимни бузиши мумкин.
“Россия ядро қуролидан фойдаланиш учун чегарани йўқотмоқда”, – деди Столтенберг.
