Тожикистон: Чет элда диний таълим олган талабаларнинг ота-оналари жавобгарликка тортилади
Тожикистонда бўлиб ўтган ҳукумат йиғилишида конституцияда кўрсатилган “ота-оналарнинг фарзандларини тарбиялаш бўйича мажбурияти” ҳақидаги қонунга ўзгариш киритиш ва бу борада янги қарор қабул қилиш масаласи муҳокама қилинди. Янги қарорга кўра, Исломий таълим олиш мақсадида давлатдан ҳуқуқий рухсат олмай чет элга юборилган болаларнинг оила аъзолари жазога тортилади.
Тожикистон парламентининг қуйи палатаси диний таълим олиш учун фарзандларини ноқонуний равишда чет эл ўқув юртларига юборган ота-оналар жавобгарликка тортилишини сўрамоқда. Қонунга киритилган мазкур ўзгаришлар фақат диний масканларда таҳсил олаётган талабаларнинг ота-оналарига тааллуқлидир.
Тожикистон парламентига алоқадор манбанинг таъкидлашича, хориждаги исломий университетларда қонуний равишда таълим олаётган талабалар ҳам доимий ҳукуматнинг назорати остида бўлади.
“Тожикистон расмийлари дипломатик ваколатхоналар орқали хорижий давлат ўқув юртлари ҳақида, яъни таълим жараёни қандай кетяпти, келажакда етишиб чиқадиган талабалар қандай дарслар ўқиши керак, шулар ҳақида маълумот тўплашади. Чет элдаги исломий университетларда таълим олаётган талабалар турли “террористик” ва “экстремистик” гуруҳларнинг тузоғига тушиб қолмаслиги учун шундай қилиш зарурдир”, дейди манба.
Хорижий мамлакатларда диний таълим олаётган талабаларни ватанига қайтариш учун Тожикистон ҳукумати 2010 йилнинг бошида ҳаракат бошлаган эди. Тожикистон парламенти “чет элда диний таълим олишни истаганлар давлат розилигини олган бўлиши кераклиги”, ҳақида конституцион ўзгаришларни 2011 йил май ойида тасдиқлаган.
Диний идора вакили Афшар Муқимнинг билдиришича, Яман, Сурия, Миср, Покистон, Афғонистон, Ироқ ва Эронда ноқонуний диний таълим олаётган 3 мингдан зиёд Тожикистон фуқаролари ўз юртига қайтарилган.
