Меркел Европа армиясини тузиш ғоясини қўллаб-қувватлади
Франция президенти Эммануэл Макарон АҚШдан мустақил ҳолда Европа иттифоқи армиясини ташкил қилиш ғоясини кўтариб чиқиши ортидан Германия канцлери Ангела Меркел биринчилардан бўлиб бу ғояни маъқуллади. Европа Иттифоқининг бирлашган қўшинининг ташкил этиш устида ишлашга чақирган Меркел бу борада тезкор, муҳим қарорлар қабул қилиш ва лойиҳалар тайёрлаш учун Европа Хавфсизлик Кенгаши тузишни таклиф қилди.
“Биз ҳарбий ҳамкорликда катта муваффақиятларга эришдик. Бу жуда яхши ва маъқул иш. Бироқ биз бугунги кунда ҳақиқий Европа армиясини яратиш бўйича ишлашимиз керак”, деди Меркел Страсбургдаги Европа парламентининг йиғилишида.
“Европа бир бўлса, кучли бўлади ва халқаро майдонда овози юксалади”, дея қўшимча қилди Германия канцлери.
Меркел Европа Иттифоқи «ўз тақдирини ўзи ҳал қилиши» кераклигига алоҳида урғу берди. Унинг айтишича, тузилажак Европа Иттифоқи қўшини дунёга “Европа давлатлари ўртасида янги уруш бошланиши мумкин эмаслигини кўрсатади. У НАТОга қарши қўшин эмас ва Европа иттифоқи билан НАТО ўртасидаги анъанавий алоқаларга ҳеч қандай шубҳа билан қарамайди.
Туркистон:
Бу ғоянинг рўёбга чиқишига АҚШ асло изн бермайди. Чунки Европа иттифоқининг Вошингтондан мустақил кучга эга бўлиши АҚШ хавфсизлигига таҳдид туғдиради. Шунинг учун АҚШ доимо Европа давлатлари ўртасида мувозанат сақлаб келишга қаттиқ аҳамият қаратиб келади. Масалан айтиш мумкинки, АҚШ НАТО иттифоқини Варшава шартномасига қарши тузган эди. Аммо Варшава шартномаси бекор бўлганига қарамай НАТО ҳали ҳануз сақланиб турибди.
Бундан аввал ҳам Франция давлати Европа иттифоқини кучайтириш ва АҚШ каби буюк давлатга айлантириш ғояси билан чиққан эди. Бунинг учун Франция авваломбор НАТОдан мустақил тарзда Европа Иттифоқи қўшинини ташкил қилиш ғоясини илгари сурган эди. Ўша пайтда ҳам бу ғояни биринчилардан бўлиб қўллаб қувватлаган Германия бўлди. Ундан сўнгра Британия ҳам бу фикрга қўшилди. Бироқ бу давлатлар фақат ўз манфаатларини кўзловчи капиталистик мабдага эга давлатлар бўлганлиги сабабли АҚШга қарши тура оладиган кучли Европа Иттифоқини ташкил қила олмади.
