Трамп: Хитой Россиядан ҳам хавфли
Хитой сайловларга аралашиш жиҳатидан Россияга қараганда АҚШга кўпроқ жиддий таҳдид солмоқда. Бу ҳақда Қўшма Штатлар президенти Дональд Трамп CBS телеканалига берган интервьюсида маълум қилди, у якшанба куни эфирга тўлиқ узатилди.
“Россия аралашди, аммо менимча, Хитой ҳам аралашди”, – деди у, Россия 2016 йилда АҚШда бўлиб ўтган президент сайловларига аралашганига ишониши борасида берилган саволга жавоб қайтариб. “Менимча, Хитой ундан ҳам жиддийроқ муаммодир”, – дея аниқлик киритди у.
Аввалроқ, Нью-Йоркдаги матбуот анжуманида АҚШ президенти Дональд Трамп Қўшма Штатларда Хитойнинг Америка сайлов жараёнига аралашишга уринишини тасдиқловчи далиллар борлигини айтди. Унинг фикрига кўра, Хитой ноябрь ойида бўлиб ўтадиган Конгрессга оралиқ сайловларга таъсир ўтказишга уринмоқда ва республикачиларнинг ғалабасига тўсқинлик қилиб, АҚШ амалдаги маъмуриятининг савдо сиёсатини тўхтатмоқчи. Хитой ташқи ишлар вазири Ван И бу баёнотларни инкор этиб, Пекин доимо бошқа давлатларнинг ишларига аралашмаслик тамойилига ҳурмат билан қараб келганини таъкидлади.
