Эрдўған мусулмонларнинг нима сабабдан ёмон ҳолатда эканини айтди
Куни кеча Туркия президенти Эрдўған БМТ саммитида иштирок этиш мақсадида АҚШга борган эди. Бугун АҚШда Туркия-Америка миллий бирдамлик жамияти (TASC) томонидан ташкил қилинган Нью-Йоркдаги анжуманда нутқ сўзлади.
Нутқи давомида кўплаб масалалар ҳақида сўз юритган Эрдўған мусулмонларнинг бугунги ҳолати ҳақида ҳам ўз фикрини билдириб ўтди: “Сўнгги йилларда содир бўлаётган воқеалар ҳаммамиз учун ибрат вазифасини бажариши керак. Мусулмонларнинг дунёдаги долзарб масалаларга оз таъсир ўтказаётганининг асосий сабаби… Сал аввалроқ Қуръони Каримдан оятлар тиловат қилинди, таржималари ўқилди. Афсуски мусулмонлар Қуръоннинг амрларига бўйсунмаяпти. Мана шунинг учун Ислом олами зайифлашиб кетди. Бўйсунмагани учун бу парокандалик бизни расво қиляпти. Роббимиз: “Ҳаммангиз Аллоҳнинг арқонига маҳкам боғланинглар, Аллоҳнинг Қуръонига боғланинглар, бўлинманглар, тафриқага тушманглар” деб хитоб қилмоқда. Давомида эса “Агар тушсангиз кучингиз кетади, зайифлашасизлар” дейди”.
Изоҳ: Хайратланарли жойи шундаки, Эрдўған қўлида катта кучи бўлатуриб, жуда кўплаб минтақалардаги мусулмонлар ёрдам сўраганида ёрдам бериш у ёқда турсин, уларга зулм қилаётганлар билан ҳамкорлик қилиб, уларни қатл қилаётганлар билан тил бириктириб, яна мусулмонларнинг Қуръонга амал қилмагани боис мана шундай аҳволга тушиб қолганини айтяпти. Хўш Эрдўған Қуръондаги ушбу оятга бўйсуняптими:
وَإِنِ اسْتَنصَرُوكُمْ فِي الدِّينِ فَعَلَيْكُمُ النَّصْر
“Агар (улар) сизлардан дин хусусида ёрдам сўрасалар, уларга ёрдам бериш сизнинг зиммангиздадир!”. (Анфол:72)
Туркиядаги сўнгги сайловлардан кейин давлат тизимидаги қонун чиқариш, ижроия ва суд органини, яъни давлатнинг барча салоҳиятини ўз қўлига олганига қарамай, ўзига қарши чиқаётганларни хоҳлаган вақтида қамоққа олаётганига қарамай, сайлов олди кампанияларда агар ўзига овоз берилса кўплаб муаммоларни бартараф қилишини ваъда берганига қарамай, ҳозиргача мусулмонларнинг манфаатига бирор фойда келтирадиган қонун чиқармади. Аксинча спорт мусобақаларига пул тикиш ўйинларини (қуморни) яна ҳам кенгайтирадиган қонунни имзолади. Бироқ Эрдўған яна мусулмонларнинг Қуръонга амал қилмаётганини айтяпти. Хўш Эрдўған Қуръондаги ушбу оятга:
يَا أَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنصَابُ وَالْأَزْلَامُ رِجْسٌ مِّنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ
“Эй мўминлар, ароқ (маст қиладиган ичкилик ичиш), қимор (ўйнаш), бутлар (яъни уларга сиғиниш) ва чўплар (яъни чўплар билан фолбинлик қилиш) шайтон амалидан бўлган ҳаром ишдир. Бас, нажот топишингиз учун уларнинг хар биридан узоқ бўлингиз!” (Моида 90)
Эрдўған Мисрга борганида журналистнинг “ҳозирги араб оламидаги муаммоларнинг сабаби нимада? Бу муаммоларга Исломни ечим деб биласизми?” деган саволга жавобан: “мен бу гапни аввал ҳам айтган эдим. Мен араб оламига илмонийликни тавсия қиламан” деган эди. Яна уялмай мусулмонларнинг Қуръонга амал қилмаганини айтяпти. Хўш Эрдўған Қуръондаги ушбу оятга бўйсуняптими:
وَمَن لَّمْ يَحْكُم بِمَا أَنزَلَ اللّهُ فَأُوْلَئِكَ هُمُ الْكَافِرُونَ… الظَّالِمُونَ… الْفَاسِقُونَ
“Кимда-ким Аллоҳ нозил қилган дин билан ҳукм қилмас экан, бас, улар кофирлардир… Золимлардир… Фосиқлардир.” (Моида 44,45,47).
