Тожикистон ва Россиянинг муштарак ҳарбий машғулоти “террорист”ларни бартараф қилиш билан якунланди.
Sputnik тарқатган хабарга кўра, Тожикистоннинг Шарқий Помир тоғли ҳудудида Россия ва Тожикистон Қуролли кучлари бир ҳафта давомида муштарак ҳарбий машғулот ўтказишди.
Хабарида айтилишича, Тожикистон ҳудудига кирган шартли террористик гуруҳларни бартараф қилиш амалиёти (Афғонистон билан чегарадош) Хоруғ минтақавий гарнизонининг “Желондий” полигонида икки давлат ҳарбийлари иштирокида амалга оширилди.
Россиянинг Тожикистондаги 201 ҳарбий базаси (РВБ) аҳолий пунктларида яшириниб олган “террористлар” га қарата ҳужум қилиб, қисқа муддат мобайнида уларни бартараф қилишди.
“Машғулотнинг якуний қисмида Россия ва Тожикистон ҳарбийлари тоғли ҳудудларда террористлар пайига тушиб, Россия Су-25 ўқ отар қуроли билан ҳаводан зарба берди ва натижада шартли терористлар, яъни “ноқонуний ҳарбий гуруҳларни” бартараф этиш амалиёти муваффақиятли якунланди”, дейилади хабарда.
Ҳарбий машғулотда 201 ҳарбий база томонидан 400 хизматчи (80дан ортиқ ҳарбий техника билан) ва Тожикистон томонидан 700 нафар ҳарбий хизматчи 40 нафар ҳарбий техника билан қатнашди. Ҳарбий машғулот жараёнига 10 минг атрофида тожик офицерлар ва захирадаги аскарлар иштирок этишди.
Туркистон:
Тожик ҳукумати бошқа Ўрта Осиё давлати раҳбарлари қатори Россиянинг содиқ хизматчисига айланиб бўлган. Шундай бўлиши табиий, зеро Эмомалий Раҳмон яқин чорак аср мобайнида тожу тахтга мустаҳкам ўрнашиб олган, атрофидагилар ҳам – тўнғич қизи, куёв боласи ва амакиваччалардан бошлаб барча-барчалари юқори лавозимларга эга бўлишган. Агар бир ришта узилса, бутун авлод мансаб мартабаси парчаланиши аниқ бўлган ҳол. Шу жиҳатдан баҳо берадиган бўлсак, агар Эмомалий Раҳмон мустамлака давлатлар ишларига рози бўлмаса, зарба фақат унгагина эмас, бутун бир сулолага тегиши мумкин.
Ҳозирча Россиянинг “Толибон хавфи”дан бошқа бир жўяли баҳонаси йук. Чунки Тожик ҳукуматининг тизгини фақат русларнинг қўлида эмас. Тожикистонинг ҳозирга ҳолатини рус ёзувчиси Крыловнинг “Ғоз, чўртанбалиқ ва қисқичбақа” масалига қиёслаш мумкин. Бир тарафдан Америка (Европа) тожик ҳукуматини бир йўналишга мажбурласа, иккинчи томондан Хитой ва учинчи томондан эса Россия бошқа-бошқа тарафга тортмоқда. Шунга кўра Россия Тожикистонда ўз нуфузини сақлаб қолиши учун қилган сайъ-ҳаракатлари кутилган натижани бериши амри маҳол. Шу боис Россия қалбаки ваҳимадан нарига ўтолмайди, зеро Тожикистоннинг зиёли қатлами, хоссатан журналистлар аллақачон АКШ таъсири остида қолган ва тожик матбуоти Россия томонидан тарқатилиши кутилаётган Толибон ва ИШИД ваҳимасига ҳисса қўшиши эҳтимолдан узоқ. Қолаверса, бунинг ёлғон эканлигини кун ора Озодлик радиоси такрорлаб келяпти. Мусулмонлар орасида ҳам низо чиқара олмайди, чунки мухолафат раҳбарлари хорижий юртларга туриб халқни норозилик намоишларига тарғиб қилаётган бўлса-да, мамлакатда диктаторлик режими устун бўлгани сабаб, бу давъатлар бир натижа бермайди. Чунки халқ норозилик намойишига журъат килолмайди. Аҳоли ижтимоий тармоқ воситасида эътироз билдиришдан нарига ўтмаяпти. Зеро мамлакат ичкарисида унга қарши чиққан шахсларга, ҳатто аҳли оиласига нисбатан қаттиқ жазолар қўлланилади.
Мунаввара.
