Трамп ва Путин учрашувдан сўнг муштарак матбуот анжумани ўтказди
Россия президенти Владимир Путин ва АҚШ президенти Доналд Трамп Финляндия пойтахти Хелсинкида учрашганидан сўнг муштарак матбуот анжумани ўтказди. Анжуманда иккала раҳбар ҳам ўзаро муҳокамага қўйилган айрим масалалар ҳақида журналисларга маълумот берди.
Анжуманда президент Владимир Путин совуқ уруш тугаганлигини ва ҳозирги давр терроризмга (Исломга) қарши уруш даври эканлигига ишора қилди.
“Совуқ уруш якун топганига анча вақт ўтди. У давр икки мамлакат ўртасида мафкуравий қарама-қаршиликлар даври бўлди. Бугун эса дунёда вазият тубдан ўзгарди. Россия ва Америка Қўшма Штатлари бошқа муаммоларга дуч келмоқда. Терроризм ва халқаро жиноятчилик хавфининг тарқалиши, хавфсизлик ва халқаро барқарорлик механизми балансининг бузилиши ҳамда жаҳон иқтисодиётида ортиб бораётган муаммолар шулар жумласидандир”, деди президент Путин.
Шунингдек Путин Терроризмга қарши кураш бўйича Москва ҳукумати “қўшма ҳаракат” гуруҳини қайта тиклашни таклиф қилганлигини билдирди. Бу билан у икки давлат разведка хизматлари ўртасидаги алоқаларни мунтазам тарзда йўлга қўйишга чақирди.
АҚШ президенти Доналд Трамп ҳам, Москва ва Вашингтон терроризмга қарши курашда алоқаларни давом эттиришини билдирар экан, Путин билан учрашувдан кейин Россия-АҚШ муносабатларида ўзгариш юз беришини маълум қилди.
“Россия билан бизнинг муносабатларимиз ҳозиргидек ёмон бўлмаган эди. Лекин бу тўрт соат давом этган учрашувимиздан кейин ўзгаради. Бу осон бўлмайди албатта. Бироқ бу учрашув имкониятини рад этгандан кўра яхшироқдир”, деди у.
Сурия масаласида эса, Путин Россия ва Америка Қўшма Штатлари, ҳеч шубҳасиз, етакчи ролни амалга ошириши ҳақида тўхталиб ўтди. Унинг таъкидлашича, бу икки давлат инсоний инқирозни бартараф этиш ҳамда қочоқларни уйларига қайтиши учун ёрдам беришга ҳамкорликни ташкил қилиши мумкин.
Ўз навбатида, Трамп ҳам Сурияда Россия ва АҚШ ҳарбийлари ўртасида мувофиқликни мақтади. Шунингдек у Исроил хавфсизлигини таъминлаш кераклигига урғу берди.
“Бугунги учрашув узоқ давом этадиган жараённинг бошланишидир. Биз доимий мулоқотни таъминлайдиган келажак сари биринчи қадамни қўйдик”, деди Президент Трамп.
Путин шунингдек, Россия ва Қўшма Штатлар глобал нефт ва газ бозорини тартибга солиш учун биргаликда иш олиб боришлари мумкинлигини таъкидлади.
“Биз Президент Трамп билан россиялик ва америкаликлар катта тадбиркорларни бирлаштирадиган юқори даражали гуруҳ ташкил қилишга келишиб олдик. Тадбиркорлар манфаатли ҳамкорликни қуриш йўлини яхшироқ билишади”, деди Президент Путин.
Бироқ Путиннинг сўзларидан Қрим масаласида Москва билан Вашингтон ўртасида зиддият мавжудлиги номоён бўлди. АҚШ 2014 йилда Қримнинг Россия томонидан қўшиб оллинишини ноқонуний босқинчилик сифатида баҳолайди.
“Президент Трампнинг Қрим ҳақидаги позицияси аниқдир ва у бунга ёпишиб олган. У Қримни Россия федерациясига қўшиб олишни ноқонунийлигини айтиб келади. Биз эса бошқа фикрдамиз. Бу масала бизга нисбатан ёпиқдир”, – деди Путин
