Путиннинг Хитойга ташрифи Москвага умид бахш этмоқда
Россия Ташқи ишлар вазирининг ўринбосари Игор Морголов Россия президенти Владимир Путиннинг Хитойга қиладиган сафарига, Москва катта умид билан боқаётганини билдирди. Морголовнинг таъкидлашича, Путиннинг июн ойида қиладиган Хитойга сафари икки мамлакат ўртасидаги стратегик шериклик имкониятларини рўёбга чиқариши учун янги туртки бўлишига умид қилинмоқда.
“Аввал айтиб ўтганимиздек, икки томонлама муносабатларимиздаги асосий сиёсий ҳодиса – бу президент Путиннинг Хитойга ташрифи ва у ерда саммит бўлиб ўтишидир”, деди Морголов “Россия – Хитой: янги аср ҳамкорлиги” номли халқаро конференциянинг очилиш нутқида.
Морголовга кўра, Президент Владимир Путиннинг июн ойида Хитойга қиладиган сафари учун ҳозирдан тайёргарлик бошлаб юборилган. Айни пайтда Путин 09-10 июн кунлари Қингдао шаҳрида бўлиб ўтадиган Шанхай ҳамкорлик ташкилоти раҳбарлари саммитида иштирок этади.
Шунингдек Игор Морголов халқаро конференцияда сўзлаган нутқида 2020 йилга қадар Россия билан Хитой ўртасидаги савдо-сотиқ кўлами 200 миллиард долларга етиши мумкинлигини олға сурди. Морголовга кўра, ўзаро ҳамкорликнинг янги моделига ўтиш ва инвестицияларни рағбатлантиришга таяниш, муваффақиятга эришишнинг асосий шартидир.
“Маълумки, Хитой тижорий ва иқтисодий соҳада давлатимизнинг асосий ҳамкори ҳисобланади. Шунинг учун ўйлайманки, икки давлат раҳбарлари томонидан белгиланган тижоратга доир вазифалар, амалда эришиш мумкин бўлган ишлардандир”, деди Морголов.
Ҳисоботларга кўра, Россия ва Хитой ўртасидаги савдо баланси 2017 йилда 87 миллиард долларни ташкил қилган. Россиянинг Хитойга қилган экспорт ҳажми 39 миллиард долларни ташкил қилган бўлса, Хитойдан келган импорт ҳажми 48,4 миллиард долларни ташкил қилган.
