Май, Макрон ва Меркел: АҚШ ядро шартномасидан чиқса ҳам биз чиқмаймиз
Британия Бош вазири Тереза Май, Франция Президенти Эммануэл Макарон ва Германия канцлери Ангела Меркел Теҳрон билан тузилган ядровий битимин қўллаб қувватлашини билдирди. АҚШ президенти Доналд Трамп 8 май куни АҚШнинг бу битимдан чиққанлигини эълон қилган эди.
Британия бош вазири Тереза Май АҚШ президенти Доналд Трампнинг ядровий шартномадан чиқиш ҳақидаги қарорини муҳокама қилиш учун Болгария пойтахти София шаҳрида бўлиб ўтган Европа иттифоқи саммити доирасида Ангела Меркел ва Эмминуэл Макрон билан учрашув ўтказди. Бу ҳақида Тереза Майнинг матбуот котиби маълум қилди. Котибнинг билдиришича, уч раҳбар шартномага содиқ қолишларини тасдиқлаб, бугунги кунда умумий хавфсизлик учун унинг муҳимлигини таъкидлаганлар.
Шунингдек, Майнинг матбуот котибига кўра, ҳар уччала раҳбар ҳам битим тузган томонлар билан бирга ишлашни давом эттиришни ва Эроннинг ўз мажбуриятларини битим асосида бажариши лозимлигига урғу беришган.
Франция президенти Эммануэл Макарон эса, Эронда фаолият юритаётган Европа компанияларини ҳимоя қилиш учун Теҳрон билан тузилган ядро шартномасини қўллаб-қувватлашга қарор қилганини эълон қилди. Макарон Европанинг иқтисодий суверенитетини ҳимоя қилиш зарурлигини таъкидлар экан, Европа компаниялари Эронда бизнес қилиш ёки қилмасликда эркин танлов имкониятига эга бўлиши кераклигини таъкидлади.
“Биз Эрон хусусида яхши маслаҳатлашиб олдик. 2015 йилда имзоланган ядровий шартнома хавфсизлик ва минтақавий тинчлик учун муҳим элементни ташкил қилади. Шунинг учун – гарчи Америка Қўшма Штатлари битимдан чиқишга қарор қилган бўласа ҳам – биз қолишга қарор қилдик ва компанияларимиз учун Эронда қолиш имконини берадиган сиёсий чоралар кўришга аҳд қилдик”, деди Макрон.
