Ватикан динлараро диалог лойиҳасини жадаллаштирмоқда
“Робита” номли жаҳон исломий иттифоқи билан Ватиканнинг “динлараро диалог” кенгаши ўртасида протокол имзоланди. Протоколга кўра, Ислом ва христианлик ўртасида умумий мақсадлар борасида доимий мажлис ташкил этиш назарда тутилган. Мазкур протокол “Робита” бош котибининг Ватиканга ташрифи ва унинг ортидан Ватиканнинг “динлараро диалог” кенгаши раисининг Саудия Арабистонига ташрифидан сўнг имзоланиши эътиборга моликдир.
Томонлар ўртасида имзоланган протоколда қайд этилишича, Мусулмонлар билан насронийлар ўртасидаги муносабатлар янада самарали бўлиши лозим. Бунинг учун “Робита” ва Папа кенгаши ўртасида мувофиқлаштирувчи кенгаш ташкил этилади. Христиан дунёсида муҳим рол ўйнаш папа кенгашига, Ислом дунёсида муҳим рол ўйнаш эса “Робита” зиммасига юклатилган. Икки дин вакиллари иштирокида ўтказиладиган мажлислар Италия пойтаxти Римда ва “Робита” тарафидан белгиланган бирор шаҳарда бўлиб ўтади.
Шунингдек протоколда келтирилишича, мувофиқлаштирувчи кенгаш томонидан амалга ошириладиган биринчи учрашув матбуотга очиқ бўлади ва учрашув оxирида қўшма декларация эълон қилинади.
Бундан аввал Ватиканнинг динлараро диалог бўйича раҳбари Жан-Луи Тауран Саудия қироли Салмон бин Абдулазиз билан учрашган эди. Айни замонда Саудия Арабистони расмийлари ва xристиан дини вакиллари ўртасида бир қатор учрашувлар бўлиб ўтди.
Саудия Арабистони жамиятини ўзгартириш учун “мўътадил Ислом” версиясини тарғиб қилаётган Шаҳзода Муҳаммад бин Салмон ҳам ўтган ойда Лондонда Англикан черковининг раиси билан учрашиб, маҳаллий ислоҳотларнинг бир қисми сифатида динлараро диологни рағбатлантиришга ваъда берган эди.
