Россия ШҲТ аъзоларини 8000 нафар қуролланган жангчилар билан қўрқитди
Суриядан Афғонистонга ўтган 8000га яқин жангарилар Шанхай Ҳамкорлик Ташкилотига аъзо давлатларнинг хавфсизлигига таҳдид солмоқда. Бу ҳақида Россия Федерал хавфсизлик хизмати бошлиғининг биринчи ўринбосари генерал Сергей Смирнов Шанхай Ҳамкорлик Ташкилотининг 32 учрашувида маълум қилди.
“Сурияда террористлар мағлубиятга учрагандан сўнг у ердаги қуролли жангарилар Эрон ва Туркия чегаралари орқали Афғонистоннинг шимолий ҳудудларига ўтган. Бу маълумот ШҲТга аъзо давлатларнинг хавфсизлик ва разведка органлари тарафидан аниқланди”, дея таъкидлади Смирнов.
Смирновга кўра, Афғонистонга кўчиб келаётган жангарилар орасида собиқ Совет Иттифоқи мамлакатлари, жумладан, Ўзбекистон, Тожикистон ва Туркманистоннинг кўплаб фуқаролари мавжуд.
Хабарда айтилишича, учрашув давомида иштирокчилар “террорчилик” таҳдидини минимал даражага камайтириш учун қўшма чора-тадбирлар кўришга келишиб олган. Келишувга кўра, ШҲТга аъзо давлатларнинг ваколатли хавфсизлик органлари ўртасида, “террорчилик” фаолияти билан шуғулланаётган шахслар ҳақида ахборотларни бир бирлари билан ўртоқлашадилар ҳамда бу одамларнинг Афғонистон ҳудудига кириб келишига тўсқинлик қилиш учун чегара соқчилари томонидан уларнинг шахсларига аниқлик киритилади. “Террорчилар”нинг интернет тармоғи орқали ўрнатган алоқаларини аниқлаш ҳам ушбу келишув жумласидандир.
Шунингдек Смирнов сўнгги тўрт йил мобайнида ШҲТ давлатларининг разведка хизмати 600дан зиёд тайёргарлик босқичида бўлган “террористик” амалиётни барбод қилганлигини ва 500дан ортиқ “террорчилар”ни тайёрлаш базаларини вайрон қилганлигини қўшимча қилди.
ШҲТ минтақавий аксилтеррор тузилмасининг 32 учрашувида саккиз мамлакатдан, яъни Россия, Қозоғистон, Хитой, Қирғизистон, Покистон, Тожикистон, Ўзбекистон ва Ҳиндистондан вакиллар иштирок этди.
Туркистон:
Бахтга қарши Афғонистондан бошланиб келаётган вазиятлар Ўрта Осиё бўйлаб, биз кутган сиёсий таҳлиллар бўйича юргизила бошлади. Россия Авғонистон ва Ўрта Осиёга нисбатан АҚШ тузган стротегияга паралелл ҳаракатланиб боряпти. Яъни у, АҚШ Афғонистонда пайдо қилиб келаётган сунъий ҳарбий вужудлар ҳақиқатини очиб бера олмади. Аксинча, Россия худди Сурияда бўлаётгани каби, АҚШнинг марказий Осиёга нисбатан фитнакашлик асосида олиб бораётган ифлос мақсади ва манфаатларига ҳамкорлик қилииш позициясини эгаллади. Россия ўзининг стротегик майдони бўлган Марказий Осиёга нисбатан ўз манфаати асосида тура олмай, рақиблари билан ҳамкорликка рози бўлиши ва ўзи учун манфаатсиз позицияларни эгаллаб бориши, унинг халқаро сиёсатдаги ҳолсиз ва тубан аҳволга тушиб қолганлигига далолат қилади. Россия ўз таъсири остидаги минтақалардаги юз бераётган жараёнларга таъсир этиш, ўзгартириш ёки рақибларининг таъсирларини йўқотиш стротегиясидан эмас, балки юз бераётган вазиятлардан ўзи учун бирор манфаат излаяпти. Бу – етакчи, оламий биринчи давлатининг позицияси эмас!
