Трамп: Қуддус “Исроил”нинг пойтахти, бу масалада музокарага ўрин йўқ
АҚШ президенти Доналд Трамп ишғол остидаги Қуддусни яҳуд вужудининг пойтахти сифатида қабул қилиш ҳақидаги АҚШнинг қарори қатъий эканлигини ва бу масалада ҳеч қандай музокара олиб бориш мумкин эмаслигини билдирди.
Трампнинг ушбу баёноти яҳуд вужудининг “Исроил Хайом” газетаси томонидан чоп этилди. Трамп газетага берган интервюсида АҚШ тарафидан Қуддусни яҳуд вужудининг пойтахти сифатида қабул қилиниши – бу ўзининг сайлов олди ваъдаси эканлигини ва кўплаб АҚШнинг собиқ раҳбарларидан фарқли ўлароқ, бу ваъдани рўёбга чиқаришини таъкидлади.
Қуддусни Исроилнинг пойтахти сифатида қабул қилиши борасида пушаймонлик ҳис этмаётганлигига урғу берган Трамп “Қуддусни музокаралар столидан чиқариб ташлаш орқали у Исроилнинг пойтахти бўлиб қолишига ва бу масала бўйича музокара олиб бориш мумкин эмаслигига кўрсатма бердим”, дея қўшимча қилди.
Яҳудийлар ва Фаластин ўртасида тинчлик ўрнатиш учун сиёсий музокараларга қайтишга чақирган Трамп, тинчлик келишувини тузиш учун ҳар икки томон ҳам баъзи нарсалардан воз кечиши кераклигини билдирди.
Яҳуд вужудининг кўрфаз давлатлари, хусусан Саудия Арабистони билан алоқалари ҳақида берилган саволга “Ҳозирги пайтда ўзаро алоқалар ўтмишга қараганда анча яхшироқдир. Бу мамлакатлар менинг Қуддус ҳақидаги қароримни ҳурмат қиладилар”, дея жавоб берди Трамп.
