Назарбоев Трамп билан нималарни муҳокама қилиши маълум қилинди
Қозоғистон президенти ҳузуридаги Стратегик тадқиқотлар институти директори ўринбосари Санат Кушкумбоевнинг “Казинформ” ахборот агентлигига берган интервьюсида маълум қилишича, Нурсултон Назарбоев АҚШ президенти Дональд Трамп билан Оқ уйда ўтказадиган учрашувида Афғонистон, Сурия ва Россия билан боғлиқ масалаларни муҳокама қилади.
“Гап АҚШ билан ҳамкорлигимизни кенг стратегик шериклик даражасига олиб чиқиш ҳақида бормоқда. Қўшма Штатлар мамлакатимиз мустақилликни қўлга киритганидан буён стратегик ҳамкоримиздир”, – деган Кушкумбоев.
Унинг сўзларига кўра, икки мамлакат минтақавий ва глобал хавфсизлик масалаларини ҳал этишда ҳамкорлик қилиб келади.
“Жумладан, Афғонистон масаласи ҳам музокаралар марказида бўлади. Бундан ташқари, Сурия инқирози, Россия билан муносабатлар эса, АҚШнинг Евросиё стратегияси нуқтаиназаридан муҳокама қилинади”, – деган институт раҳбари ўринбосари.
Хабарларга кўра, Қозоғистон президенти Нурсултон Назарбоевнинг АҚШга расмий сафари 16-18 январ кунлари амалга оширилади.
