بِسْمِ اللهِ الرَّحْمٰنِ الرَّحِيم
АҚШнинг Афғонистондаги стратегияси
Саволга жавоб
Савол:
2017 йил 15 августда Толибон ҳаракати АҚШ президентига мактуб йўллаб, уни Афғонистондан Америка кучларини олиб чиқиб кетишга, қўшимча кучларни киритмасликка чақирди. «RT Arabic»нинг 2017 йил 15 августдаги хабарида «Толибон ҳаракати АҚШ президенти Дональд Трампга очиқ хат йўллаб, унда Афғонистондан ўзининг барча кучларини олиб чиқиб кетишга чақирди ҳамда Вашингтонга қаршилик кўрсатаётган ушбу юртда АҚШ кучлари сонини оширишга киришишдан огоҳлантирди», дейилади. Толибон ҳаракати мактубни Трампнинг Афғонистонда янги стратегия кўзлаётганига жавобан ёзди ва у айни стратегия зимнида қўшимча кучлар юбориш ҳам бўлиши мумкинлигидан чўчимоқда. Зеро, Оқ уй масъуллари томонидан бу янги стратегияни қабул қилишга яқин қолгани тўғрисида қатор баёнотлар чиқмоқда. Масалан, мазкур сайтда хабар қилинишича, жорий йил 10 августда Трамп журналистларга «унинг маъмурияти Афғонистон билан боғлиқ янги стратегияни қабул қилишига яқин қолган»ини таъкидлади. Сўнг «Бу мен учун катта қарор, чунки аввалги маъмуриятдан менга кўп бошбошдоқликлар қолган, биз уларни сезиларли даражада озайтиришга ҳаракат қиляпмиз», дея қўшимча қилди. Хўш, буларнинг барчаси Америка Афғонистонда янги стратегия қабул қилишда жиддийми? Бу стратегия қўшимча кучлар юборишни ўз ичига оладими ёки қўшимча кучлар юбормасдан фақат Покистон ва Ҳиндистоннинг Афғонистондаги ролини фаоллаштиришни ўз ичига оладими? Аллоҳ сиздан рози бўлсин.
Жавоб:
Ҳа, айтиш мумкинки, Америка Афғонистондаги аралашувининг «сўнгги босқич»ига йўл топиш умидида ўз стратегиясини қайта кўриб чиқишга жиддий ҳаракат қилмоқда. Трамп Афғонистондаги ҳарбий қўмондонликдан ғазабда. «Рейтер» агентлигининг жорий йил 3 августдаги хабарига кўра, АҚШ президенти Трамп билан Вашингтон масъуллари ўртасидаги учрашув кескин суратда ўтган, «учрашув давомида Трамп АҚШ мудофаа вазири Жеймс Мэттис билан қўшма штаблар қўмитаси раиси генерал Жозеф Данфордга, Афғонистондаги АҚШ кучлари қўмондони генерал Жон Николсон урушда муваффақият қозонолмагани учун уни вазифасидан озод этиш масаласини ўрганишлари керак, деган. Ана шунда йиғилишда таранг вазият юзага келган».
Шундай қилиб, Американинг Афғонистондаги уруши борасида Трампда шубҳа пайдо бўлмоқда. Гарчи Обама маъмурияти ҳам АҚШнинг Афғонистондаги стратегиясини қайта кўриб чиққан бўлса-да, бироқ Трамп маъмурияти олиб бораётган бугунги мурожаатда ўзига хослик бор. Ўзига хослиги шундаки, бу қайта кўриб чиқиш, Америка ва унинг оламдаги мавқеи борасида халқаро муаммолар янада мураккаблашаётган бир пайтда бўлмоқда. Буни қуйидагича батафсил баён қилиш мумкин:
Биринчидан: Америка 2001 йил охирида 11 сентябр ҳужумларига жавоб, деган дастак остида Афғонистонга уруш эълон қилди. Бу эълон кичик Буш маъмуриятини исканжага олган Неоконсерваторлар қистови билан бўлди. Орадан икки йил ўтиб, Америка Ироққа ҳужум қилиб, уни босиб олди ва бу билан Ироқ қумига бўғзигача ботди… ундан суғуриб чиқаришларини сўраб, ҳаммани ёрдамга чақирди. Американинг Ироқ ботқоғига ботиши, унга Афғонистондаги урушни аҳамиятсиз қилиб қўйди, чунки у бутун диққатини Ироқ ботқоғидан чиқиб олишга қаратди. Зотан, Ироқ ва унинг қаршилик ҳаракати Буш маъмуриятини ҳам, ундан кейинги Обама маъмуриятини ҳам бутунлай машғул қилиб қўйганди. Обама маъмурияти 2011 йил охирларида Ироқдан Америка кучларининг аксарини олиб чиқиб кетиш масаласида муваффақиятга эришди. Ана шунда Америка тобора ривожланиб бораётган Хитой билан шуғулланиш учун янги стратегия қабул қилишга киришди. Бу масала Обама маъмуриятининг иккинчи даврида ҳам, айни стратегия ҳали тугамасидан олдин ҳам, ҳатто уни тайёрлаш ва ишлаб чиқиш жараёнида ҳам Американи бутунлай банд қилиб қўйди. Дарҳақиқат, Америка араб баҳори қўзғолонлари олдида ўзининг араб минтақасидаги, хусусан, Суриядаги нуфузига путур етаётганига гувоҳ бўлди. Натижада, ўз саъй-ҳаракатларини тақсимлашига тўғри келди: араб минтақасидаги, хусусан, Суриядаги қўзғолон хавфига қарши курашишга ва Узоқ Шарқдаги Хитойга қарши курашга тақсимлади. Ўзини гўё Хитой найрангига алданмайдиган қилиб кўрсатиб, Япония ҳарбий ҳаракатини жонлантириш ва Шимолий Кореяни провокация қилиш йўлига ўтди. Американинг Афғонистондаги маълум даражадаги мағлубиятлари сабабли Афғонистон ва у ердаги уруш масаласи унинг диққат марказидан узоқлашди. Албатта, бу Американинг Афғонистон масаласига бутунлай эътибор бермай қўйганини англатмаса-да, бироқ маълум янги устувор масалалар унинг учун асосий диққат марказига айлангани фош бўлмоқда.
Иккинчидан: Афғонистонда ўн олти йилдан бери уруш тўхтамаётгани эътиборидан, қатъий айтиш мумкинки, АҚШ кучлари ва урушда уларга ҳамкорлик қилаётган НАТО кучлари омадсизликка учради. Бу омадсизлик афғон қаршилик ҳаракатини, асосан, 2001 йилда Американинг ўзи ҳукуматдан четлатган Толибон ҳаракатини илдизи билан йўқ қила олмасликда гавдаланади. Яна шуни ҳам қатъий айтиш мумкинки, Афғонистондаги малайларини мустаҳкамлашда у учун танлов (вариант) қолмади ва бу уни навбатдаги омадсизликка олиб келди. Америка ўзининг тили билан айтилаётган «Афғон исёни»ни тўхтатиш учун у ерга Ҳиндистонни киритди, аммо бу ҳам унга наф келтирмади… Афғонистондаги Америка мағлубиятларини камайтириш учун Вазиристон ва бошқа вилоятларда уруш олиб бораётган покистонлик малайлари ҳам унга фойда бермади, Толибон ҳаракати билан ярашув сари бўлаётган саъй-ҳаракатлар ҳам олдинга силжимади…
Шунинг учун 16 йилдан бери олиб бораётган урушдан сўнг, Американинг Афғонистондаги вазияти ғоят оғирлиги кўринади. Чунки Толибон ҳаракати Афғонистондаги катта минтақада эмин-эркин ҳаракатланяпти, Қобулдаги малай ҳукумат бу ҳаракатга ҳеч қандай таъсир ўтказа олмаяпти. Бу ҳаракат юртнинг аксар минтақаларида, ҳатто пойтахт Қобулда ҳам даҳшатли кучли ҳужумларни амалга оширяпти… АҚШ кучлари Афғонистонда хавфсизлик ўрнатишга муваффақ бўлолмади. Қолаверса, америкалик кучларга қарши содир этилаётган кўп ҳужумлар манбаси Вашингтон ўзи машғулотдан ўтказаётган афғон армиясидаги оддий аскарлар бўлмоқда… Бу билан Американинг Афғонистондаги танловлари барбод бўляпти.
Бугун Афғонистон воқеси ва унинг не чоғли хавфли экани тўғрисида Карнеги институти 2017 йил 22 майдаги ҳисоботида бундай дейди: «Афғон режимининг бир мунча заифлиги ва Толибон ҳаракатининг қайта назоратсиз қолиши, афғон ҳукумати режимини ҳалокатга олиб келиши, ўз навбатида, қайта анархия бошланиб, террорчи жамоаларнинг кўпайишига сабаб бўлиши мумкин». Бу ҳисоботда Афғонистондаги кураш йилига 23 миллиардга тушаётгани учун унга барҳам бериш лозимлиги таъкидланаётгани йўқ, балки бу юртдаги ечим учун таклиф қилинаётган танловлар тугаётгани учун урушни тезроқ тўхтатиш таъкидланмоқда.
Тўғри, Обама бошқаруви даврида америкалик аскарлардан кўпчилиги чиқиб кетиб, 10 минг атрофида қолди, уларга 3 мингта НАТО кучлари ёрдам бермоқда, шунингдек, АҚШ хавфсизлик хизмати компанияларининг 20 минг аскари қолган, холос… Бироқ бу чиқиб кетишлар бирор ғалаба ёки олдинга силжишлар натижасида бўлгани йўқ. Дарҳақиқат, Толибон ҳаракати АҚШ армиясидан холи қолган базаларни дарҳол босиб олди… Афтидан, малай афғон ҳукумати армияси шунча кўп бўлса ҳам, америкалик аскарлар уларга шунча меҳнат сарфлаб машғулотдан ўтказса ҳам, бу ҳукумат армияси пойтахт ташқарисида ҳеч қандай фаолият қилолмаяпти. Бу ҳарбий жиҳатдан.
Учинчидан: Энди сиёсий жиҳатга келсак, Америка ўзининг Афғонистондаги танловлари камайиб қолаётганини ҳамда Ҳиндистон танлови омадсиз чиққанини тушуниб етгач, Толибон ҳаракатига музокара таклифини қўйишга мажбур бўлди, шу орқали уни Афғонистондаги америкача бошқарувга қўшишни мақсад қилди, Толибонни музокара столига тортиш учун Покистондаги ўз малай ҳукмдорларини ишга солди. Бироқ Америкага бу уринишлари ҳам омад келтирмади, Афғонистон мавзусида ҳам ҳарбий, ҳам сиёсий муваффақиятсизликка учради. Қолаверса, унинг қаршисида бу мавзу учун аниқ режа ҳам топилмай қолди ва бунинг учун танқидларга учради. Интерфакс ахборот агентлигининг Россия ташқи ишлар вазирлигидаги бир манбага таянган ҳолда қилган хабарига кўра, «Дональд Трамп маъмуриятининг Афғонистонга оид бирор реал сиёсий таклиф билан чиқа олмаслиги, бу юртдаги мубҳамликка ва беқарорликка қўшимча бўлмоқда. Бундан ташқари бу ҳолат афғон ҳукуматининг мустаҳкамлиги даражасига, НАТОга аъзо давлатларнинг ўз ҳарбий кучларини жойлаштиришда эгаллаган позициясига, умуман олганда юртдаги вазиятни изга солиш жараёнларига боғлиқдир». (Русиял Явм 2017 йил 3 август).
Тўртинчидан: Бундан аён бўляптики, АҚШнинг Афғонистондаги бўҳрони жуда мураккаб бўлиб, танловлари қолмади. Америка ҳарбий ва иқтисодий энергиясининг емирилишдан тўхтатиб қолиш учун айни урушга бутунлай якун ясашнинг имкони бўлмаса, у ҳолда, Афғон урушини музлатишга жуда муҳтож бўлади. Баъзи ҳарбий раҳбарлар Толибон ҳаракати устидан ғалаба қозониш учун америкалик кучлар сонини янада кўпайтириш зарур, деб ҳисоблашяпти. Президент Трамп бу фикрга рози бўлиш учун узоққа чўзилмайдиган программа ва сезиларли аниқ натижани талаб қилмоқда. Аммо ҳарбийлар, 16 йиллик аччиқ тажрибалари эътиборидан, бу талабни унга амалга ошириш қўлларидан келмайди, бу фақат назарий жиҳатдан шундай, холос. Очкўз Трампнинг сўлагини оқизаётган нарса эса, бу юртдаги улкан минерал бойликлар… Америка уларнинг қийматини триллион доллар, деб ҳисобламоқда. Бундан ташқари, Афғонистон Ўрта Осиё нефтини ташиш учун йўлак вазифасини ҳам ўтайди. 2017 йил 26 июлда «Дастур» газетаси сайтининг «The New York Times»га таянган ҳолда қилган хабарида бундай дейилади: «Ўтган ҳафта имкониятларни ўрганиб чиқиш мақсадида Оқ уй афғонистонлик металлургия масъуллари билан учрашиш учун Қобулга ўзининг махсус вакилини юбориш масаласини ўрганди. Оқ уй Афғонистонга оид сиёсат борасида ғоят кучли муросасиз жанжалга кирган бир пайтда, Трампнинг таниқли ёрдамчиларидан уч нафари «American Elements» кимё компаниясининг таниқли директорларидан бири Майкл Н. Сильвер билан учрашиб, Афғонистондаги нодир металларни қазиб олиш имкониятларини муҳокама қилишди». Лекин ҳатто Трамп ақлиясини (фикрлашини) эгаллаб олган савдо шартномалари нуқтаи назаридан олиб қараганда ҳам, бу юртдаги АҚШ кучлари сонини кўпайтириш ҳамда у ердаги конларни қазиб олиш учун темир йўли ва йўллар қуриш каби инфратузилмага сармоя ётқизиш танлови хавфсиз танлов эмас. Чунки айни конлар Толибон ҳаракати назорати остидаги ерларда жойлашган.
Шуларга биноан, демак, Трамп маъмурияти танлаши эҳтимоли бўлган танлов шундан иборатки, АҚШ армияси Афғонистондаги ҳарбий базаларга чекланади-чекинади ва шу орқали ювиндихўр ҳукуматни емирилишдан сақлаб туради, у ерга олиб кирган Ҳиндистоннинг муваффақиятсизлиги ортидан, энди, Покистонни олиб кириш учун унга бўлган босимни кучайтиради. Буларнинг барчаси Қобулдаги америкача сиёсий бошқарувга Толибон ҳаракатини қўшишга, афғон қўзғолонини тўхтатишга, яъни Американинг узоқ вақтлик урушига якун ясашга қаратилади. Шундай қилиб Америка ўзининг айни юртдаги жойлашувини хавф туғилган пайтда ҳаракатга келувчи ҳарбий базаларга ўзгартириш орқали чеклашни, Афғонистондаги уруши харажатларини салмоқли тарзда озайтиришни умид қилмоқда. Ана шунда Американинг Афғонистондаги ҳолати худди Форс Кўрфази минтақасидаги ҳолатига ўхшаб қолади. Чунки у ерда ҳам ўз базалари билан чекланган. Бундан ташқари, Америка покистонлик малайлари ёрдамига ҳам чекланади, чунки уларнинг Толибон ҳаракати билан бўлган алоқа иплари узилмаган. Шу боис, Толибон Американинг шартларига рози бўлиши учун Покистон ёрдамида у билан қайта алоқаларни тиклаб, ишончини қозонишга ҳаракат қилиши ҳам мумкин. Дарвоқе, Обама даврида Америка ўзининг покистонлик малайларидан яхши фойдаланган. «Афғон ҳукумати юртдаги иккинчи экстремистик жамоа бўлган Ҳизбул Исломий билан битим тузишга муваффақ бўлди. Битим имзоланишида жамоа раҳбари Гулбиддин Ҳикматёр бўлмади. Битимга президент Ашраф Ғаний билан айни қуролли жамоа вакиллари имзо чекди». (Би-Би-Си 2017 йил 22 сентябр). Бу Америкага Толибон мавзуида Покистондан фойдаланишига янада шижоат берди, хусусан, яқинда Ҳикматёр ярашувдан сўнг Қобулдаги ҳукуматга қайтиб, Толибон ҳаракатини сиёсий режимга қўшилишга даъват қилди: «Афғонистон Ҳизбул Исломий раҳбари Гулбиддин Ҳикматёр Толибон ҳаракатидан афғон ҳукуматига қўшилишни талаб қилди. Қобулга қайтганидан сўнг қилган илк маърузасида Толибонни ажнабий кучларни юртдан тинч йўл билан чиқаришда кўмаклашишга тарғиб қилди». (Ал-Жазира нет 2017 йил 5 июн).
Бешинчидан: Маълумки, Америка Хитой ҳавзасида улкан хавфга дуч келди. Айниқса, Шимолий Корея билан ўрталаридаги вазият кундан-кунга совуқлашиб боряпти, Сурияда хавф-хатар давом этяпти… Американинг «иқтисодни тиклаш йўлидаги самарали сиёсати» ҳам омадсиз чиқди. Бу бир томондан. Бошқа томондан, Афғонистондаги АҚШ қўшини ҳолдан тойган, ғалаба қозонишга умидлари сўнган, бунинг устига, Ҳиндистоннинг Афғонистондаги роли ҳам маҳаллий жиҳатдан абгор аҳволда, энди Ҳикматёрнинг қайтишидан бирор яхшилик умид қиляпти… Мана шуларнинг барчасидан кўриниб турибдики, Америка уруш қилиш билан уддасидан чиқолмаган мақсадларини энди ярашув йўли орқали рўёбга чиқаришни умид қилмоқда. Шунинг учун Покистонни Афғонистондаги ролини қайта фаоллаштиришга ҳамда Покистон ичкарисидаги ва Афғонистон билан чегараларидаги ҳужумларни енгиллатишга қарор қилди. Масалан, янги ҳарбий қўмондон Бажва давомида саккиз ой Покистон майдони катта амалиётлардан холи бўлди. Аммо айни катта амалиётлар Бажвадан олдинги Раҳил Шариф қўмондонлиги замони «Азб зарбаси» каби катта амалиётлар билан машҳур бўлганди. Турли босқичдаги бу амалиётлар Афғонистон билан чегарадош ҳудудлардаги Раҳил тили билан айтилган «террорчилар»га қарши олиб борилди. Ҳатто генерал Раҳил даврида Кашмир чегаралари бўйида Покистон армиси билан Ҳиндистон ўртасидаги айрим кичик-кичик тўқнашувлар ҳақида қулоққа чалинадиган бўлди. Бунинг эса, ички жиҳатдан ҳам, Толибон ҳаракати раҳбарияти даражасида ҳам Бажвадан рози бўлиш кайфиятини оширишига асло шубҳа йўқ.
Шу билан бирга Покистон армиясининг янги қўмондони Бажва Афғонистонга Исломий Давлат ташкилотига қарши кураш дастаги остида ёрдам қўлини чўзишга ҳаракат қилди. Яъни Толибон ҳаракатига қарши курашни Исломий Давлат ташкилотига қарши кураш томонига буриш билан терроризмга қарши кураш тушунчасини бир оз ўзгартирди. Бундай йўналиш ағфон ҳукуматига ҳам тегишли, Бажвадан олдинги Раҳилга қаттиқ нафрат туйиб келган Қабилалар минтақаси жангчиларига ҳам тегишли. Бажванинг афғон-Толибон ҳаракати билан олиб борган сўзлашуви сир тутилди: «Покистон армияси қўмондони генерал Қамар Жавид Бажва икки қўшни давлат ўртасидаги икки томонлама муносабатларни илгари кузатилмаган даражада ривожлантириш йўлида Исломий Давлат ташкилоти таҳдидига қарши курашиш учун Афғонистонга ҳамкорлик қўлини чўзди. Генерал бу саъй-ҳаракатини Афғонистон билан чегарадош минтақалардаги Покистон қабилалар Иттиҳоди бошқарувида жойлашган Водий Куррамда қабила етакчилари билан ўтказган учрашувида билдирди. У икки томонлама алоқаларда илгари кузатилмаган даражадаги бундай муносабатларни «иттифоқ ва сергаклик» дея юксак баҳолади. Сўнг – биз айни таҳдид қаршисида доим бирдам, ҳушёр ва тайёр турмоғимиз лозим, деди». (Холиж онлайн 2017 йил 1 июл).
Американинг афғон мужоҳидлари, айниқса, Толибон ҳаракати билан бўйлашишга ожизлик қилаётганини, афғон президентининг Саудиядаги Трамп саммити ортидан берган мана бу баёноти ҳам тасдиқлаб турибди: «Энг муҳими афғон ҳукумати ярашишни истайди, биз Толибондан танловни истаймиз, агар улар ярашувни танласалар, барча истаган нарсаларига сиёсий ва қонуний томондан эришишлари мумкин. Биз Толибондан террорчилардан узоқлашишини истаймиз». (Шарқул Авсат 2017 йил 25 май). Ушбу баёнотдан маълум бўляптики, Америка Толибон ҳаракатига – уларни ўзининг терроризмга қарши урушидан чиқарганига, ҳатто улар бу урушда афғон ҳукумати томонига ўтишлари мумкинлигига, кейин эса, ўзларининг Америкага қўйган чиқиб кетиш талабларини уруш йўли билан эмас, тинчлик йўли орқали амалга оширишлари мумкинлигига ишора қиляпти.
Олтинчидан: Хулоса ўрнида айтишимиз мумкинки, Трампнинг Афғонистондаги стратегияси қайта кўриб чиқилмоқда, чунки бугун Американинг дунё бўйлаб олиб бораётган сиёсий ҳаракатларида хавф-хатарлар қалашиб кетган. Юқорида ёритилган воқеа-ҳодисалардан, демак, кўпроқ тахмин шуки, Американинг Афғонистондаги стратегиясини қайта кўриб чиқиши қуйидагиларни ўз ичига олади:
- Афғонистон уруш майдонини мутлақ музлатиш, АҚШнинг у ердаги ҳарбий жойлашувини базаларга чеклаш ва улардан бирор хавф туғилган пайтда фойдаланиб, гўё уларнинг вазифасини Исломий Давлат ташкилотига қарши курашишдан иборат, қилиб кўрсатиш;
- Американинг Афғонистонга қўшимча кучларни жангни кучайтириш мақсадида жўнатиши эҳтимолдан узоқ. Уларни фақат қисқа вақтга ва ҳарбий мақсадсиз жўнатади. Яъни бу кучлар «Агар Толибон ҳаракати ён бериб, афғон ҳукумати билан – табиийки, Америка манфаатларига дахл қилмаган ҳолда – ҳамкорликда ишлашга рози бўлса, биз ҳам айни кучларимизни олиб чиқиб кетамиз», деган мақсад учун керак бўлади.
- Толибонни рози бўлишга авраш мақсадида Америка Покистон ролини қайта фаоллаштиради. Буни Покистондаги янги армия қўмондонлигини Толибон билан ғоят мулойим илиқ муносабат ўрнатган қилиб кўрсатиш билан амалга оширади. Бундан эса, Толибонни Қобулдаги ҳукумат билан музокара столига ўтиришга ва Афғонистондаги америкапараст сиёсий бошқарувда у билан ҳамкорлик қилишга кўндириш кўзланган.
Еттинчидан: Сўзимизни тамомлар эканмиз, мусулмонларни Америкага ювиндихўр бўлган Покистондаги раҳбарларга таянишдан ҳамда у ердаги ҳарбий қўмондонликнинг Афғонистон билан илиқ муносабатига алданиб қолишдан огоҳлантирамиз. Зотан, мозийдан сабоқ олмоқ лозим. Чунки Америка Покистондаги малайлари ёрдами бўлмаганда эди, Афғонистонга қадамини ҳам қўя олмасди. Бугун Покистон Толибонга бунчалар илиқ сиёсат олиб бораётган экан, бу масхарабозлик саҳнасидан ўзга нарса эмас. Американинг режаси, Афғонистондаги ўзининг малай бошқарувига ҳеч қандай харажатсиз бурнини суқиб, ундан хавф-хатарларни йўқ қилишдан иборат. Покистон ҳукмдорларидан эса, мана шу ифлос режанинг иккинчи башараси кўриниб, фош бўлмоқда. Илгари Америка Обама режаси билан Раҳил каби покистонлик тобелари орқали Вазиристондаги афғон мужоҳидларига босим қилиб, шавкатини синдиришни талаб қилиб келди. Аммо шу пайтга қадар бу босқинчи давлат Толибонни ҳалокатли музокаралар столига куч билан ўтиришга мажбур қилиш ва жиҳод режасини илдизи билан йўқ қилиш сиёсатини олиб бориш билан омади келмагач, энди, бугун Трамп режаси бўйича, Покистондаги ўзининг янги малайлари орқали Толибонни авраб, жиловлаб олишга уринмоқда. Унинг покистонлик малайлари маккорлик билан Толибон ҳаракатига яқинлик кўрсатиб, уни музокаралар столига ўтқазишмоқчи. Шунинг учун биз Америка ва унинг малайлари қўйган бундай фитна қопқонига илинишдан ёки уларга таянишдан огоҳлантирамиз:
«Зулм йўлини тутган кимсаларга берилиб кетманглар (эргашманглар). Акс ҳолда сизларга дўзах ўти етар. Сизлар учун Аллоҳдан ўзга бирон дўст йўқдир. Кейин (яъни золимларга эргашсангиз) сизларга ёрдам берилмас» [Ҳуд 113]
24 зул-қаъда 1438ҳ
16 август 2017м
