Стивен О’Брайен: БМТ Сурия шармандалигидан қутила олмайди
Бирлашган Миллатлар Ташкилоти Сурия шармандалигидан қочиб қутила олмайди. Бу эътироф БМТ бош котибининг гуманитар ишлар бўйича ёрдамчиси ва фавқулодда вазиятлар координатори Стивен О’Брайенга оиддир. У бу ҳақида БМТ Хавфсизлик Кенгаши томонидан Суриядаги гуманитар вазият юзасидан ташкил қилинган йиғилишда ўз вазифаси доирасидаги сўнги бор маърузада айтиб ўтди.
“Сурия келажагининг, яъни бир халқ ва бир давлат келажагининг йўқ қилинишига биргаликда гувоҳ бўлдик. Одамларнинг қандай очликдан ўлганлигини ва болаларнинг соҳиллардаги жонсиз таналарини кўрдик. Кетма-кет учрашувлар ўтказиб, бу ҳалокатнинг тафсилотларини муҳокама қилдик. Аммо бу жиноятларни содир этганларни жавобгарликка тортишни эплай олмадик. БМТдаги вазифамдан кетар эканман, барча гуманитар ёрдам ҳаракатларига қарамай, ҳеч биримиз 500 мингдан ортиқ инсоннинг ўлими ва миллионлаган кишиларнинг майиб-мажруҳ бўлиб қолишига тўсиқ бўла олмаган жамоий шармандалик улушимиздан қочиб қутила олмаслигимизни айтиб ўтмоқчиман”, деди О’Брайен сўнги бор сўзлаган нутқида.
Бутун дунё давлатлари ва халқлари тинчлик ва хавфсизлик борасида БМТ Хавфсизлик Кенгашига умид боғлаганлигини эслатиб ўтган Стивен О’Брайен “Яман ва Суриядаги аёллар, болалар, қариялар ва касалманд инсонларнинг хавфсизлик ҳуқуқи ушбу стол атрофида ўтирганларнинг ҳуқуқидан кам эмас”, дея қўшимча қилди.
Шунингдек Стивен О’Брайен ўз нутқида Раккадаги вазият ҳақида гапириб, бу шаҳарда ҳар куни ўртача 27 киши ҳалок бўлганини ҳам эслатиб ўтди.
