Доктор Анита Шуг: Араканда 3 кун ичида 2 мингдан ортиқ мусулмон қатл этилди
Сўнги 3 кун ичида Араканда 2-3 минг оралиғида мусулмон қатл этилди ва 100 мингдан ортиқ мусулмон қувғин қилинди. Бу ҳақида Европа Роҳингя кенгашининг сўзчиси доктор Анита Шуг маълум қилди. Швейцарияда шифокор бўлиб ишлайдиган Шугнинг таъкидлашича, бу қатлиом Бирма давлат армияси тарафидан амалга оширилган.
“Араканда сўнгги кунларда Бирма ҳарбийлари мусулмонларга қарши амалга оширган қатлиомлар 2012 йилда ва ўтган йил октябр ойида амалга оширилган қатлиомлардан бир неча маротаба ортиқдир. Вазият ҳеч қачон бунчалик ёмон бўлмаган эди”, деди Шуг Анадолу ахборот агентлигига берган интервюсида.
Шунингдек Шуг кеча Араканнинг фақатгина Саугпар қишлоғида 900-1000 оралиғида Мусулмонлар ваҳшийларча ўлдирилганлигини ва бу қатлиомдан қишлоқда фақат биргина бола омон қолганлигини қайд этди.
“Яна Анаукпин ва Няунгпини қишлоқлари ҳам маҳаллий будпараст аҳоли томонидан қамал қилинган. Бу одамлар Бирма ҳукуматига мактуб йўллаб, ўзларининг айбсиз эканликларини ва ҳеч қандай жиноятга қўл урмаганликларини билдирдилар. Улар ҳукуматдан қамални бекор қилиш ва қишлоқдан тезда эвакуация қилишни сўрашди. Аммо Бирма ҳукуматидан жавоб келмади. Бу қишлоқлардаги одамларнинг ҳам ҳаёти хавф остида”, дея қўшимча қилди сўзчи.
Шуг Аракан қирғинига чек қўйиш учун БМТ каби муассасалар ва ташкилотларни ҳаракатга келишга чақирди.
Ўрни келганда шуни таъкидлаб ўтиш жоизки, Бирма давлати 1948 йил 19 апрелдан буён Анита Шуг тилга олиб ўтган БМТ (Бирлашган Миллатлар Ташкилоти)нинг аъзосидир. Бироқ шундай бўлишига қарамай, дунё кўз ўнгида 6 йилдан буён давом этиб келаётган Бирма ҳукуматининг қирғинларини тўхтатиш учун БМТ шу вақтгача номига бўлса ҳам бирор қадам ташламади.
