Путин: Сиз туфайли мужоҳидларга катта зарбалар берилди
Германиянинг Ҳамбург шаҳрида бўлиб ўтган Г20 раҳбарлари саммити ортидан Туркия президенти Ражаб Тоййиб Эрдоған Россия президенти Владимир Путин билан икки томонлама учрашув ўтказди. Ёпиқ эшиклар ортида ўтказилган учрашув бир соат давом этди.
Учрашувдан илгари қисқача баёнот берган Путин рус кучларининг Сурияда амалга оширган ишларида Эрдоғаннинг роли катта бўлганлигини бидириб, унинг позициясига мақтовлар ёғдирди.
“Жаноб президент, сизнинг позициянгиз туфайли Суриядаги вазиятни ўзгартириш имкониятига эга бўлдик. Бу давр мобайнида террорчиларга (мужоҳидларга) катта зарба берилди, ва ечим жараёни жиддий тарзда илгарилади. Хусусан сиз билан келишилган шартномалар туфайли Сурия масаласида жуда ижобий қадамлар ташлашга муваффақ бўлдик”, “Сизнинг ва барча ҳамкасбларингизнинг ҳамда барча ҳамкорларингизнинг позициясини қадрлайман”, деди Путин Эрдоғанга хитобан.
У яна Россия-Туркия алоқаларига доир “икки томонлама муносабатларни тўлиқ шаклда ривожлантириш ва бизнинг эътиборимизни тортган масалаларни ҳал қилиш учун сўнги пайтларда бир қанча ишлар қилинди”, дея қўшимча қилди.
Эрдоған эса бу соҳада Туркия-Россия муносабатларининг ижобий натижаларига ишора қилди. Эрдоғаннинг ишонч билан таъкидлашича, хоҳ иқтисодий алоқаларда бўлсин, хоҳ туризм соҳасида бўлсин, хоҳ хавфсизлик масаласида бўлсин, Туркия-Россия ўртасидаги алоқаларнинг ривожланиши икки давлат ўртасидаги ўзаро муносабатларни жуда кучли мавқега олиб чиқади.
“Ишонаманки, минтақа халқи ва дунё аҳолисига намуна сифатида ўртамиздаги икки томонлама муносабатларнинг мустаҳкамланиши ҳақиқатан ҳар икки давлат халқи учун улкан фойдалар келтирмоқда”, “Авваламбор Сурия, Ироқ борасида кутганларимиз рўёбга чиқмоқда. Мен шу жиҳатдан учрашувларимизни юқори баҳолайман. Ҳозиргача бўлган қатъиятингизга шахсан ўзим номимдан ва халқим номидан ташаккур бидираман”, деди Эрдоған.
