Қамоқхоналарда радикаллашувни олдини олиш масаласи муҳокама қилинди
“Азаттык” радиоси берган хабарга кўра, 2-июн куни Бишкек шаҳрида қамоқхона тизимида радикаллашувни олдини олиш билан боғлиқ халқаро тажриба тахлилига бағишланган давра суҳбати бўлиб ўтди.
Давра суҳбатида терроризм ва экстремизм моддалари бўйича судланиб, жазо муддатини ўтаётганларнинг қамоқхоналардаги бошқа маҳбусларга бўлган таъсирини чеклаш шартлари муҳокама қилинди. Муҳокамада нотўғри талқин қилинган диний мафкурага алданиш ортидан экстремистик ва террористик оқимларнинг ижтимоий базаси кенгайиб бораётгани айтиб ўтилди.
Жазони ижро этиш давлат хизмати раиси Таалайбек Жапаровнинг сўзларига кўра, қамоқхоналардаги шароит оддий айбланувчиларнинг радикаллашувига ҳисса қўшмоқда.
Маълумки, 2016-йилнинг охиридан бошлаб Қирғизистон қамоқхоналарида диний айбловлар билан қамалганларни бошқа маҳбуслардан алоҳида сақлаш тажрибаси жорий қилина бошланган эди.
Айни вақтда диний айбловлар бўйича судланганлар бошқа маҳбуслардан ажратилиб, Чуй вилоятидаги 27, 47 ва 3- сонли қамоқхоналарида ташкил этилган ёпиқ тартибли қамоқхоналарга кўчирилган.
