АҚШ ҳарбийларининг юкини енгиллаштириш Саудия зиммасига тушди
АҚШ президенти Доналд Трамп Саудия Арабистонига қилган сафари чоғида Саудия қироли Салмон бин Абдулазиз билан 110 миллиард доллар қийматига тенг қурол-яроқ битимини имзолади. Оқ Уй тарафидан берилган баёнотга кўра, бу шартнома АҚШ тарихида имзоланган энг йирик қурол-яроқ шартномасидир. Хусусан бу шартноманинг Трамп ва Салмон ўртасида имзоланиши 110 миллиард долларлик Америка қуролининг сотилганлигини англатади.
Reuters ахборот агентлиги тарқатган хабарга кўра, мазкур шартнома 6 миллиард доллар қийматидаги 150 дона Blackhawk русумли вертолётни ҳам ўз ичига олади.
Франсуз AFP ахборот агентлигига интервью берган Оқ Уй вакилининг таъкидлашича, ўзаро битимга биноан Саудия Арабистони минтақада юритилаётган террорга (Исломга) қарши амалиётларга кўпроқ ҳисса қўшади ва АҚШ ҳарбийларининг зиммасидаги юкни енгиллаштиради.
Оқ Уй вакили бу шартномалар АҚШ ва Саудия Арабистонининг хавфсизлик соҳасидаги ҳамкорлигини сезиларли даражада кенгайтиришини ҳам қўшимча қилди.
“Бу шартномалар Саудиянинг бутун минтақа бўйлаб аксилтеррор операциялардаги иштирок этиш имкониятларини кенгайтиради”, деди АҚШ маъмурияти ходими.
Трамп бундан бир ой аввал берган баёнотида ар-Риёдни Вошингтонга нисбатан адолатсизлик қилаётганликда айблаган эди. Трампга кўра, АҚШ Саудияни ҳимоя қилиш учун жуда кўп маблағ сарфлаганлигига қарамай, ар-Риёд Вошингтоннинг ҳимояси остида қолиши учун зиммасига тушганини бажармаган. Шунингдек, Трамп сайлов компанияси пайтида ҳам Саудияга қарата шундай танқидлар ёғдирган эди.