Сурияда хавфсиз ҳудудлар ташкил қилиш АҚШнинг режасидир
Остонада Сурия бўйича ташкил қилинган тўртинчи тур музокараларда Сурияда можародан холи “хавфсиз ҳудудлар” ташкил қилиш устида меморандум имзоланди. Меморандумга кўра, Латакия, Ҳалаб, Ҳама ва Хумс вилоятларининг маълум қисми, Шарқий Гута минтақаси, Даръа, Қунайтра провинцияларининг бир қисми ва Идлибнинг бутун провинцияси Суриянинг хавфсиз зоналари сирасига киритилди. Бу минтақаларда жанг қилиш, қурол ишлатиш ва ҳатто осмонларда ҳарбий самолётларнинг учиши таъқиқланади. Шунингдек меморандумда кўрсатилишича, икки ҳафта ичида бир гуруҳ ташкил қилиниб, кафил давлатларнинг вакиллари “хавфсиз ҳудудлар” чегарасини белгилаб чиқади. Бу зоналарни хавфсизлик билан таъминаш кафил давлатлар, яъни Россия, Эрон ва Туркия зиммасига тушади.
Туркия Ташқи ишлар вазирлиги Остона йиғилишида “хавфсиз ҳудудлар”ни ташкил қилиш ҳақида имзоланган меморандумни мамнуният билан қабул қилишини маълум қилди. Туркия президенти Ражаб Тоййиб Эрдоғанга кўра, “хавфсиз ҳудудлар”ни ташкил қилиш муваффақиятли амалга ошса, бу Сурия муаммосининг 50 фоизи ҳал бўлганлигини англатади. Россия Ташқи ишлар вазири Сергей Лавров ҳам Идлибда “хавфсиз ҳудудлар” ташкил қилиш Суриядаги курашнинг тугашига олиб келиши мумкинлигини билдирди.
Оммавий ахборот воситалари Сурияда “хавфсиз ҳудудлар” яратиш режасини Россия, Эрон ва Туркияга нисбат беришга уринса-да, аслида бу АҚШнинг режасидир. “Financial Times” газетасининг хабарида айтилишича, АҚШ президенти Доналд Трамп Россия Президенти Владимир Путин билан телефон орқали суҳбатида Сурияда “хавфсиз зоналар” ташкил қилиш ҳақида муҳокама қилган. Хабарларларга кўра, Трамп ва Путиннинг суҳбати Эрдоган ва Путин учрашувидан икки соат олдин бўлиб ўтган. Шундан сўнг Эрдоган ва Путин Сурияда “хавфсиз ҳудудлар” яратиш устида келишиб олганлиги ҳақида хабарлар тарқалди. Шунингдек газета АҚШ ташқи ишлар вазирининг ўринбосари Стуарт Жонес кузатувчи сифатида Остонага юборилганлигини ҳам эътибордан четда қолдирмади.
Бу режадан кўзланган мақсад Эрон, Туркия ва Россия қўшинларидан фойдаланиб, Суриядаги мухолиф кучларни изоляция қилиш орқали тиз чўкай деб қолган Асад режимини қайта оёққа турғизишдир. Яъни бу инқилоб лойиҳасини йўқ қилиш учун ўйлаб топилган яна бир ҳийладир. Чунки эътибор берган киши “хавфсиз ҳудудлар” ташкил қилиш учун Асад режими билан мухолиф кучлар ўртасида қизғин тўқнашувлар кетаётган минтақалар белгиланганлигини кўради.
