Сурияда кимёвий қуролнинг қўлланиши бутун дунёни ларзага солди
Суриянинг Идлиб шаҳри яқинида жойлашган Хон Сайхун минтақасига уюштирилган кимёвий ҳужум бутун дунёни ларзага солди. Жаҳон соғлиқни сақлаш ташкилоти (ЖССТ) юзлаган инсонларнинг, жумладан ёш болалар ва аёлларнинг заҳарланиб ўлишига сабабчи бўлган кимёвий қурол асабни шол қилувчи газга далолат қилишини маълум қилди. ЖССТга кўра, бу ҳужум 2013 йилда Суриянинг Ғута шаҳрида амалга оширилган кимёвий ҳужумдан сўнг энг даҳшатли ҳужумдир.
АҚШ президенти Доналд Трамп ҳодиса юзасидан баёнот бериб, Сурия ҳукуматини қизил чизиқдан ўтиб кетганликда айблади. Ҳужумнинг аянчли ва даҳшатли эканлигини айтиб ўтган Трамп Сурия Президенти Башар Асадга нисбатан муносабати ўзгарганлигини билдирди.
“Асад режимининг инсониятга қарши бу жирканч ҳаракатларидан кўз юмиш мумкин эмас. Мен Суриядаги кимёвий ҳужумларга қарши ҳаракатга келиш устидан масъулман. Бу ишларни қабул қилиш мумкин эмас. Менинг Сурия ва Асадга нисбатан муносабатим ўзгарди. Бу мен учун бир қанча қизил чизиқдан ўтиб кетиш ҳисобланади”, деди Трамп.
Аммо АҚШ президенти бу ҳужумларнинг натижалари Сурия режимига нисбатан қандай бўлиши ҳақида маълумот бермади.
БМТ Хавфсизлик Кенгаши ҳам Хон Сайхун шаҳрида уюштирилган кимёвий қурол ҳужумимини муҳокама қилиш учун дарҳол Ню-Ёркда тўпланди. Йиғилишда Британия, Франция ва АҚШ томонидан тайёрланган қарор лойиҳаси муҳокама қилинди. Аммо БМТ Хавфсизлик Кенгашининг кимёвий қурол ҳужумига доир мажлиси натижасиз якунланди. Чунки хавфсизлик кенгаши аъзоларининг бир-бирларини айблаши туфайли ҳужумни қаттиқ қоралаш ва дарҳол ойдинлик киритиш талаб қилинган қарор лойиҳасини овозга қўйиш мумкин бўлмади.
БМТ Хавфсизлик Кенгашининг мажлиси натижасиз якунланиши ортидан АҚШнинг БМТдаги элчиси Никки Ҳалей АҚШнинг Сурияда ёлғиз ҳаракат олиб бориши мумкинлиги ҳақида маълум қилди. “Агар БМТ биргаликда ҳаракат қилиш мажбуриятини бажаришда давомли муваффақиятсизликка учраса, ўз чора-тадбирларимизни кўришга мажбур бўламиз”, деди. Аммо Ҳалей бу чора-тадбирлар нималардан иборат эканлиги тафсилотига киришмади.
