Трамп: Қарзингни тўлаб қўй
АҚШ президенти Доналд Трамп Германия канцлери Ангела Меркел билан Оқ уйда учрашув ўтказгандан сўнг орадан бир кун ўтиб, ўзининг твиттер саҳифаси орқали Германиянинг АҚШ ва НАТОдан катта миқдорда қарздорлигини даъво қилди.
“Германия НАТО ва Америкага катта миқдорда маблағ тўлашга мажбур. Чунки НАТО ва АҚШ уни кучли ва режали тарзда ҳимоя қилиб келмоқда”, дея ёзди Трамп ўзининг твиттер саҳифасида.
Трамп бир кун аввал Меркел билан учрашуви ортидан ташкил қилинган муштарак матбуот анжуманида ҳам журналистларга интервю бериб, суҳбат чоғида Германияни ҳимоя қилиш харажатларини кўпайтириш талабини такрор тилга олганлигини билдирган эди. “НАТОни кучли тарзда қўллаб қувватлашимни ва айни пайтда иттифоқдошларимиз ҳимоя харажатларини тўлашларига эҳтиёжимиз борлигини Меркелга яна бир бор эслатдим”, деган эди Трамп.
Бироқ ўз навбатида Германия мудофаа вазири Урсула вон дер Лейен АҚШ президентининг қарз даъвосига жавобан Германиянинг АҚШ ва НАТОдан ҳеч қандай қарзи йўқлигини билдирди.
“Биз НАТОдан қарздор эмасмиз. Мудофаа харажатларимиз айни пайтда БМТнинг тинчликпарвар кучлари миссиясига ва Европа миссияларига ҳамда ИШИДга қарши курашга ҳам сарфланмоқда”, деди Германия мудофаа вазири.