Остонада Сурия бўйича навбатдаги музокаралар бошланмоқда
РИА “Новости”нинг хабар қилишича, Сурия ҳукуматининг Башар Жаафари бошчилигидаги делегацияси Остона шаҳрига етиб келган. Бу ерда 14-15 март кунлари Сурия бўйича навбатдаги музокаралар ўтказилади.
Остонада Сурия бўйича юқори даражадаги навбатдаги халқаро учрашув сешанба куни бошланади. Қозоғистон ТИВ маълумотига кўра, 14 март кунига дастлабки маслаҳатлашувларни ўтказиш режалаштирилган бўлса, 15 март куни умумий мажлис бўлиб ўтади.
Январ ойида Россия президенти Владимир Путиннинг Остонада Сурия тинчлик жараёни бўйича қўшимча музокаралар майдонини ташкил этиш ҳақидаги таклифи Туркия ва Қозоғистон президентлари томонидан қўллаб-қувватланди. Остонада Сурия бўйича музокараларнинг биринчи босқичи 23-24 январ кунлари бўлиб ўтди. 15-16 феврал кунлари ўтказилган иккинчи босқичда Суриядаги сулҳ бўйича Эрон, Россия, Туркия иштирокидаги мониторинг гуруҳини ташкил этиш бўйича келишувга эришилган эди.
Россия қуролли кучлари бош штабининг тезкор бошқармаси бошлиғи Сергей Рудской эса ўтган ҳафтада 14-15 март кунларига режалаштирилган учрашувда Сурия Араб Республикасида “Жабҳот ан-Нусра” ва “ИШИД” террорчи гуруҳлари тузилмаларининг борлигига оид ягона харита ишлаб чиқилиши якунланиши ҳақида маълум қилган. Шунингдек, асирларни алмашиш бўйича ишчи гуруҳ ва конституциявий комиссияни ташкил этиш муҳокама қилиниши мўлжалланган.
