Россия, Туркия ва Эрон Сурия тақдирини хал қилиш учун Остонада яна йиғилишди
6 феврал куни Остона шаҳрида Суриядаги вазиятни тартибга солиш бўйича 23-24 январ кунлари шу шаҳарда эришилган келишувлар асосида яратилган тезкор гуруҳнинг илк йиғилиши бошланди.
Остонада 23-24 январ кунлари Сурия масаласи бўйича кафил мамлакатлар – Россия, Эрон ва Туркия Сурияда ўт очишни тўхтатиш режимига риоя қилиниши устидан назорат механизмини яратишга келишиб олганди. Кафил мамлакатлар ўзлари эълон қилган баёнотда “ИШИД” ва “Жабҳат ан-Нусра”га қарши курашишда давом этиш ниятларини тасдиқлаганди.
Эрон, Туркия ва Россия Сурия инқирозини тартибга солиш учун БМТ кўмагида Остона платформасида ҳамкорлик қилишга келишиб олди. Ушбу мамлакатлар, шунингдек, Суриянинг яхлитлиги ва суверенитетини тасдиқлади.
РИА Новости манбаси 5 феврал куни маълум қилишича, учрашувда Россия, Туркия, Эрон, БМТ ҳамда Иорданиядан экспертлар иштирок этади.
Учрашувдан кўзланган мақсад Суриядаги низо томонларининг жанговар ҳаракатларни тўхтатиш режимига риоя қилишининг боришини муҳокама қилиш, ярашувнинг бузилишини назорат қилиш ва бунинг олдини олиш бўйича чоралар ишлаб чиқиш, Сурия ҳукумати ва мухолифат ўртасида ўзаро ишончни ошириш, шунингдек, гуманитар ҳамкорлик масалаларини ҳал қилишдан иборат.
