Атамбаев янги конституцияни тасдиқлади
Президент матбуот хизматининг хабар қилишича, Алмазбек Атамбаев жума куни янгиланган конституция расмий матнини эълон қилиш ҳақидаги фармонга имзо чекди. Имзо чекиш маросими спикер ва парламент фракциялари етакчилари, олий суд раиси, шунингдек, марказий сайлов комиссияси ва конституция палатаси раҳбарлари иштирокида ўтказилган.
Матбуот хизмати маълумотига кўра, президент маросим давомида асосий қонунга умумий ҳисобда 40та тузатиш киритилганини таъкидлаб ўтган. “Унда шунингдек, аввал давлат (қирғиз) ва расмий (рус) тилларда баён этилган бир қатор ноаниқликлар бартараф этилди”, – дейилади хабарда. Фармон давлат ОАВларида эълон қилинганидан сўнг расман кучга киради.
Маълумки, конституцияга тузатишлар киритиш ҳақидаги референдум ўтган йилнинг 11 декабр куни бўлиб ўтган эди. Конутитуциядаги ўзгаришлар президент ваколатини камайтириш, парламент ва бош вазир ҳуқуқларини кенгайтириш, шунингдек, суд ва ҳуқуқни муҳофаза қилиш тизими ислоҳотини кўзда тутади.
