Жубайр: Биз Трамп билан ҳамкорлик қилишни интизорлик билан кутяпмиз
Саудия ташқи ишлар вазири Адил Жубайр АҚШнинг янги президенти Доналд Трамп маъмурияти борасида ижобий кўз қарашда эканликларини билдирди. Жубайрнинг таъкидлашича, Саудия ҳукумати икки мамлакат учун манфаатли бўлган барча масалалар бўйича Трамп билан ҳамкорликда фаолият олиб боришни орзуқиб кутмоқда.
“Трамп маъмурияти борасида ижобий кўзқарашдамиз. Икки мамлакат учун манфаатли бўлган барча масалалар бўйича ҳамкорликда фаолият олиб боришни сабрсизлик билан кутяпмиз”, деди Саудия ташқи ишлар вазири Адил Жубайр.
“Ал-Арабия” телевизион канали орқали баёнот берган Адил Жубайр Трамп маъмуриятининг ИШИДни мағлуб қилиш, АҚШнинг дунёдаги ролини такрор юксалтириш ва Эрон масаласи ҳақидаги режаларини мамнуният билан қабул қилишини билдирди.
Шуни айтиб ўтиш лозимки, Доланд Трамп сайлов олди кампанияси чоғида мусулмонларга қарши қизғин баёнотлар берар экан, Саудия ҳақида алоҳида тўхталиб, унинг Америкадаги мавжуд барча омонат маблағларини ўзлаштириб олишга ишора қилган эди.
“Саудия бой давлатдир, шунинг учун у биздан олаётган сиёсий ва хавфсизлик ёрдами эвазига пул тўлаши лозим”. “Саудия яқинда катта қийинчиликларга дучор бўлиб қолади ва бизнинг ёрдамимизга муҳтож бўлади. Агар биз бўлмаганимизда Саудия асло мавжуд бўлмас эди ва сақланиб қолмас эди…”, деган эди Трамп Американинг Эн-Би-Си телевидениесига берган интервюсида.
Шунингдек, АҚШ конгресси тарафидан тасдиқланган «гаста» номли қонун ҳам Саудия Арабистонини бироз ноқулай аҳволга солиб қўйди. Чунки бу қонун 2001 йил 11 сентябрда Нью-Йоркдаги халқаро савдо марказига уюштирилган ҳужумларда ҳалок бўлганларнинг оилалари учун Саудия Арабистонига қарши даъво очиш имконини беради ҳамда уни компенсациялар тўлашга мажбур қилади.
