Туркия аҳолисининг аксарияти террор ортида АҚШ ва Ғарб давлатлари турганлигига ишонади
Сўнгги кунларда Туркияда амалга оширилган террор ҳужумлари АҚШга нисбатан танқидларни кучайтирди ҳамда Инжирлик ҳаво базаси ҳақида тортишувларни юзага келишига сабаб бўлди. “A&G” тадқиқот маркази тарафидан 42 вилоятда олиб борилган сўровлар натижасидан маълум бўлишича, сўровда иштирок этганларнинг 76%и террор амалиётларининг ортида ташқи кучлар, хусусан Америка турибди, деб билади.
Ҳуррият газетасининг ёзувчиси Абдулқодир Селви президент Ражаб Тоййиб Эрдоған бошчилигида тўпланган 2017 йилнинг биринчи вазирлар кенгаши йиғилишида баъзи вазирлар “АҚШ учун Инжирлик ҳаво базасини ёпишимиз керак”, деган таклиф киритганлиги ҳақида ёзди. Селвининг ёзишича, бу вазирлар Инжирлик ҳаво базаси АҚШга очилганидан сўнг террор ҳодисалари бошланганлигига ишонади.
“Бу масала вазирлар кенгашида муҳокамага қўйилган мавзулардан эмас. Шундай бўлса-да, баъзи вазирлар Инжирлик ҳаво базасини АҚШга очилганидан сўнг терроризм ҳодисалари бошланди деган ишончдалар. Улар “шундай экан биз ҳам Инжирлик ҳаво базасини ёпишимиз керак”, деган фикрларини ўртага ташламоқда”, дея ёзади Селви.
Бироқ, Нью-Йоркда туриб баёнот берган Туркия ташқи ишлар вазири Мавлут Чавушўғли айни пайтда Инжирлик ҳаво базасини ёпиш ҳақида ҳеч қандай масала кўтарилмаётганлигини маълум қилди. Бироқ АҚШ Туркиянинг муҳим иттифоқчиси эканлигини урғу берган Чавушоғлунинг таъкидлашича, агар Америка ИШИДга қарши етарли дастак бермаса бу ҳолат жамоатчиликнинг норозилигига сабаб бўлади.
“Инжирлик ҳаво базасини ёпиш масаласи кун тартибига киритилмаган. Аммо коалиция ИШИДга қарши курашда ҳаводан дастак бермаса унинг бу ерда туришининг ҳеч қандай маъноси қолмайди. Бундай ҳолда халқимиз ҳам, уларга нима учун Инжирлик ҳаво базасидан жой бериб қўйибсиз? Биз шаҳидлар беряпмиз, сиз нега дастак бермаяпсиз, дастак бермасангиз нега келдингиз? дейиши табиий. Бу жуда ўринли савол”, деди Чавушоғлу.
Туркия ва АҚШ алоқаларида муҳим ўринни эгаллаган Инжирлик ҳаво базасида ҳозирда 2500 атрофида АҚШ аскарлари мавжуд. Ҳарбийларнинг оиласини ҳам ҳисобга олганда Инжирлик ҳаво базасида минглаган инсонлар истиқомат қилади. Бундан ташқари, у ерда АҚШ ресторанлари, Америка молларини сотувчи йирик супермаркетлар, баскетбол ва бейсбол майдонлари мавжуд.
