Атамбаевни танқид қилиш мумкин эмасми?
Жалолобод вилоятида яшовчи фуқаролар “Фейсбук” ижтимоий тармоғида президент Алмазбек Атамбаев тўғрисида ёзганлари сабабли хавфсизлик хизматида уч кун сўроқ бериб, огоҳлантириш олишди. Сузоқдан тўрт, Бозорқўрғондан беш, Аҳсининг икки фуқарога огоҳлантириш берилган. Бу ҳақида сўроққа чақирилган фуқароларнинг ўзлари “Озодлик” радиоси қирғиз хизматига маълум қилишди. Улар хавфсизлик хизматидан огоҳлантириш олишганидан сўнг “Фейсбук”дан фойдаланмай қўйишганини айтишди.
Ўз навбатида МХДҚ вилоят бошқармаси бу хабарни инкор қилиб, ҳеч ким сўроққа чақирилмаганини билдирди.
10 январда айрим ахборот воситалари ва “Фейсбук”да МХДҚ раиси ўринбосари Болот Суйумбаевнинг “Фейсбук”да президент Атамбаев тўғрисида салбий фикр билдирган 45 киши аниқлангани, уларнинг яшаш жойи ва интернетга кирган манзили аниқланаётгани ҳақида Жогорку Кенеш депутати Ирина Карамушкинага ёзилган жавоб хати пайдо бўлган эди.
Туркистон:
Ижтимоий тармоқларда, хусусан “Фейсбук”да Қирғизистон раҳбарияти олиб бораётган сиёсатни танқид қилиб, ҳукуматнинг асл башарасини очиб ташлаётган мақола ва постлар кўпайиб бораётгани расмий ҳукуматни ташвишга солиб қўйган кўринади. Ўз одатига мувофиқ расмий ҳукумат бундай кўринишларни олдини олиш учун қўллайдиган ишончили усули –қўрқитиш сиёсатини бошлаб юборди.
МХДҚ ҳукуматга ҳисоб бериш учун танқидий фикр билдирган фуқаролар яшаш жойи ва интернет манзилини аниқлашга киришиб, бир қатор Қирғизистон фуқаролари рўйхатини эълон қилди. Қизиғи шундаки, махсус хизмат эълон қилган рўйхат ҳақиқатга мос келмайслигидир. Ўзини “ернинг остида илон қимирласа сезадиган” ҳисоблайдиган махсус хизмат ижтимоий тармоқ фойдаланувчиларининг интернет манзилларни аниқлай олмай дуч келган фуқаро ёки давлат номини келтириб ўтипти. Бундан кўзланган мақсад эса аниқ – қандай қилиб бўлса ҳам фуқаролар қалбига қўрқув солиш, ҳукумат олиб бораётган сиёсатга салбий муносабат билдирмай, кўрларча ва карларча эргашишга мажбур қилишдан иборат холос.