Россия Атамбаевнинг сўзларига жавоб қайтарди
Маълумки, Алмазбек Атамбаев 1 декабр куни бўлиб ўтган йил якунига бағишланган матбуот анжуманида Россия ҳарбий базаси тўғрисида саволга жавоб берар экан база Қирғизистон ҳудудидан келишув муддати якунига етгач “чиқиб кетиши керак” эканлигини маълум қилган эди.
“Албатта, бу кимгадир ёқмаслиги мумкин. Бироқ Россия президенти барчасини тўғри тушунди. Мени Атамбаев америка базасини чиқариб юборди, аммо Россияникини қолдирди, деб кўп танқид қилишмоқда. Аммо Россия билан келишув имзоланган. 2016 йилда амалдаги муддат якунланади, шундан сўнг база яна 49 йилга қолиши ва 25 йилга чўздирилиши керак эди. Лекин биз фақатгина 15 йил қолдирдик”,- деган эди Атамбаев.
Кутилганидек, рус ҳукумати Алмазбек Атамбаевнинг бу баёнотига тезда жавоб қайтариб, агар база чиқариладиган бўлса, Қирғизистон терроризм билан ёлғиз курашишига тўғри келишини эслатиб қўйишди.
“Агарда Атамбаевга базанинг кераги бўлмаса, демак у (Атамбаев) терроризм билан ёлғиз курашишга тайёр эканда, толиблар яқин ерда юришипти. Бироқ шошилиб ечим чиқармай турайлик, эҳтимол охирида улар фикрларини ўзгартиришлар”,- деди халқаро ишлар бўйича бўлим бошлиғи ўринбосари Владимир Жабаров.
Жабаровнинг бу баёноти кўпроқ эслатишдан кўра огоҳлантиршга ўхшаб, агар Атамбаев Россия чизиб берган чизиқдан четга чиқадиган бўлса, мамлакатни Россия томонидан уюштирилиши мумкин бўлган қўпорувчилик амалиётлари қамраб олишини уқтириб қўймоқчи бўлди. Маълумки, Россияни бундай “қўпорувчилик амалиётларни” уюштиришда улкан тажрибаси бор.
Бундан ташқари, Атамбаев олиб бораётган сиёсат Россияни қаноатлантирмай қўйган кўринади. Қирғизистон ҳукумати кундан-кунга заифлашиб боряпти. Мухолифат эса аксинча кучайиб, ҳатто атамбаевчи партия ҳисобланган ҚСДП сафида ҳам бўлинишлар пайдо бўлмоқда. Путинга эса учинчи рангли инқилобни кераги йўқ.
Шу сабабли ҳам Атамбаев матбуот анжуманида “Россия президенти Владимир Путин иккинчи муддатга қолишни сўрагани”ни айтган бўлсада, аслида Путин ундан тинчгина ва ортиқча шов-шувларсиз кетишни талаб қилган бўлиши мумкин.
