Қозоғистон мактабларида ҳижоб тақиқланди
Қозоғистон аҳолисининг 70 фоизидан зиёдини мусулмонлар ташкил этишига қарамай, қозоқ ҳукумати ҳам қўшни республикалар каби Ислом ва мусулмонларга қарши курашини тўхтовсиз давом эттириб келмоқда. Қозоғистонда ҳам амалдаги ҳукумат мусулмонлар “ваҳимаси”дан ўз режимини мустаҳкамлаш йўлида фойдаланмоқда.
Маълумки, 2016 йил 5 июн куни Актобе шаҳрининг 3та туманида отишмалар юз берган эди. Хабарларга кўра, номаълум шахслар қурол сотиладиган дўконга ҳамда ҳарбий қисмга ҳужум қилишган. Отишмалар давомида 3 киши ҳалок бўлиб, 10дан ортиқ киши жароҳатлангани хабар қилинган эди. Расмий ҳукумат эса бу иш хали тўлиқ текшириб чиқилмай туриб, “ҳужум қилганлар диний экстремистик гуруҳ аъзолари бўлишгани”ни айтиб чиқган эди. Шундан сўнг мазкур шаҳар ва вилоятда кенг кўламли “тозалаш ишлари” бошлаб юборилган ва ўнлаб мусулмонлар қамоққа олинган эди.
Қозоқ ҳукумати Ислом динига нисбатан бўлган тоқатсизлигини намоён қилиб, жамият ичидан исломий кўриниш ва қадриятларни суриб чиқаришга жиддий ҳаракат олиб бормоқда. Чунки, ҳукумат томонидан бўлган таъқиқ ва тазйиқларга қарамай Қозоғистон мусулмонлари Ислом динига талпиниб, қилаётган ҳар бир ишларида ширъий ҳукмга кўпроқ боғланишмоқда.
Бундан олдинроқ, Қозоғистон президентининг қизи, Қозоғистон сенати депутати Дариға Назарбоева “Қозоғистонда ҳалол (исломий) боғчалар бор эканлигин эшитиб ҳайратга тушгани”ни маълум қилган бўлса, бугунга келиб Қозоғистон ҳукумати мактабларда ҳижоб ёки “динни тарғиб қилувчи” ҳар қандай кийимни ман қилганини эълон қилди.
Таълим вазири ўринбосари Эльмира Суханбердиева қатор вазирликлар ўртасида 19 октябрда бўлиб ўтган муҳокамалардан кейин бу қарорга келинганини айтди.
Қозоғистон таълим ва фан вазирлигининг билдиришича, 2017 йилнинг январидан эътиборан мамлакатнинг бошланғич ва ўрта таълим муассасаларида ўқувчи қизларнинг ҳижоб ўрашига тўлиқ тақиқ жорий этилади.
