Сурия масаласи бўйича яна бир учрашув муваффақиятсиз якунланди
Салкам бир аср муқаддам Швейцариянинг Лозанна шаҳридаги “Beau-Rivage Palace” меҳмонхонасида Халифалик давлатини батамом йўқ қилиш учун “Лозанна шартномаси” имзоланган эди. Бугунга келиб яна худди ўша мехмонхонада Сурия масаласини ҳал қилиш борасида келишиб олиш учун АҚШ бошчилигида йиғилиш ташкил қилинди. Бироқ Ғарб давлатлари учун ўтган Лозанна йиғилиши муваффақиятли ўтган бўлса, бугунги Лозанна йиғилишидан эса ҳеч қандай натижа чиқмади.
АҚШ Давлат котиби Жон Керри Лозанна йиғилишидан сўнг баёнот бериб, йиғилишда ҳеч қандай битим тузилмаганлигини, фақат янги-янги фикрлар ўртага ташланганлигини маълум қилди. Керрига кўра, Сурия масаласида турли ёндашувлар ўртага ташланган ва айрим ғоялар илгари сурилган бўлсада, бироқ минтақадаги тангликни юмшатиш учун аниқ бир ҳаракатлар устида келишувга эришилмаган. Керри душанба кунидан бошлаб яна келгуси қадамлар таланишини ҳам таъкидлаб ўтди.
Россия Ташқи ишлар вазири Сергей Лавров ҳам мазкур учрашув ҳақида баёнот бериб, яқин кунларда алоқалар яна давом этишини маълум қилди.
Оммавий ахборот воситалари ҳам АҚШ, Россия,Туркия, Саудия Арабистони, Эрон, Қатар, Иордания, Ироқ, Миср давлатларининг Ташқи ишлар вазирлари ҳамда БМТнинг махсус вакили Стаффан де Мистура иштирок этган Лозанна учрашувида Сурия масаласи бўйича маълум бир қарор қабул қилинмаганлиги ҳақида хабарлар тарқатишди.
Хабарларга кўра, мазкур йиғилишда оташкесимни жорий қилиш ва Ҳалаб шаҳрига инсонпарварлик ёрдами етказиб бериш масаласи муҳокама қилинган. Туркия гуманитар ёрдам масаласида халқаро конвой ташкил қилишни таклиф қилган бўлсада, бироқ бу борада ҳам якдил бир қарор қабул қилишга эришилмаган.
Лозанна учрашувидан бирор натижа чиқмагач, эртаси куниёқ, Араб ва Европа давлатларининг расмийлари Сурия масаласига ечим топиш учун Британия пойтахти Лондонда яна қайта тўпланишди. Бу йиғилишда Саудия ташқи ишлар вазири Адил ал-Жубайр, АҚШ давлат котиби Жон Керри ҳамда Франция, Германия, Италия, Туркия ва Бирлашган Араб Амирликларидан мансабдор шахслар иштирок этди. Бироқ ҳали ҳам натижадан дарак йўқ.
