АҚШ разведка раиси: Сурия муаммолари учун қўлимизда сеҳрли таёқ йўқ
АҚШ Марказий Разведка Бошқармаси (МРБ) раиси Жон Бреннан Сурия муаммоларини ҳал қилиш учун унинг юрти қўлида «тезкор ечим ёки сеҳрли таёқча йўқ»лигини айтди. Бунга у ўзаро курашаётган ички ва ташқи кучларнинг кўпайиб кетгани, мазҳабпарастлик бўлинишлар ҳамда репрессив йилларни сабаб қилиб келтирди. Ўтган чоршанба Вашингтондаги «Стратегик ва халқаро тадқиқотлар маркази»да ўтказилган ушбу мулоқотда Бреннан «Мен хавфсизлик масалаларида олиб борган 36 йиллик фаолиятимда Сурия масаласи мен учун энг чигал масала бўлди», дея қўшимча қилди.
Америкалик бу масъул Сурия муаммоларини тезда ҳал этилмагани сабабини «Ўзаро курашаётган ички ва ташқи кучларнинг кўпайиб кетгани, мазҳабпарастлик бўлинишлари, Асад оиласи шуғулланиб келган ва юртнинг демократия сари интилишларини музлатиб қўйган репрессив йиллар» билан боғлади.
«Бугун кўпчилик Американинг у ерга бориб, айни масалаларнинг кўпини ҳал қилишдан ожизлик қилаётганидан нолимоқда. Аслида, мен ҳам қани энди қўлимизда сеҳрли таёқча бўлганда эди, айни муаммоларни ҳал қилиб қўя қолган бўлардик, деяпман. Шундай бўлса-да, Вашингтон ҳеч бўлмаса уриниш борлигига шукр қилмоқда», деди.
Кейин сўзларини «Қўшма Штатларнинг Сурияда бўлаётган гуманитар фожеаларга ва қон тўкилишига якун ясашга уринишни давом эттираётгани жуда яхши. Аммо мен тан оламанки, қўлимизда одамларга зўрлаб тиқиштирадиган ва мажбуран эргаштирадиган бирор ечим йўқ», дея давом этди.
У Сурия бўҳронини ҳал этиш учун «бир неча йиллар керак бўлиши»ни таъкидлаб, мана буларни алоҳида урғулади: «Араб баҳори Ўрта Шарқ тарихида янги босқич олиб келаётган эди. Бироқ демократия иқтисодий, сиёсий, ижтимоий, маърифий ва бошқа соҳаларда ўз илдизини мустаҳкамлаб олгунга қадар, олдинда ҳануз олис йўл мавжуд». (Ал-Жазира нет).
Роя газетаси шарҳи:
МРБ раиси Жон Бреннан сўзлари бир неча нуқтани таъкидламоқда:
Биринчи: У Американинг Сурияда қанчалар боши берк кўчада қолганини, бу давлат Россиядан ёрдам сўраганига ва Эронни, унинг Ҳизбини ишга солганига қарамай, ўз сиёсатини зўрлаб тиқиштиришга ҳамон қодир бўлолмаётганини ифодаламоқда. Боши берк кўчада қолганини у «Қўлимизда Суриядаги муаммоларни ҳал қилиш учун бирор сеҳрли таёқча йўқ», деган гапи билан билдирмоқда.
Иккинчи: Унинг «Қўшма Штатларнинг Сурияда бўлаётган гуманитар фожеаларга ва қон тўкилишига якун ясашга уринишни давом эттираётгани жуда яхши», деган гапи ёлғон. Чунки Шом аҳли машаққатларига биринчи жавобгар мана шу Америкадир. Чунки уларга нисбатан зулм қилаётган Башар Асад шу Америкага тобе. Асад жиноятларига шериклик қилаётган Эрон ҳам Америка сиёсатини бажаряпти. Ўзининг учоқ ва ракеталари билан Шом аҳлини қираётган Россия ҳам бу ишни Америка билан келишиб олиб, айрим манфаатлар эвазига унинг сиёсатини бажариб бериш учун қиляпти. Америка бошчилигидаги коалиция учоқларига Шом аҳлини қиришлари учун Инжирлик базасини очиб берган Туркия ҳам шу Америка сиёсатини бажаряпти. Американинг Шом аҳлини қириш ва уларни қочқинга айлантириш ролига оид гаплар фақат сиёсий таҳлилчиларга ёки фақат сиёсат билан амалий шуғулланаётган кишиларга чекланиб қолгани йўқ. Балки бу давлатнинг Шом қирғинида бажараётган роли оддий одамлар учун ҳам фош бўлиб қолди.
Учинчи: Бреннан Сурия бўҳронини ҳал этиш учун бир неча йиллар кераклигини, ёки Араб баҳори олис йўл эканини айтар экан, Америка ўз сиёсатига одамларни тиз чўктириш учун қирғин қилиш, оч қўйиш, қочқинга айлантириш сиёсатини тўхтовсиз давом эттирмоқчи эканини билдирмоқда. Ҳа, бу давлат шуларни режелаштирмоқда. Биз Аллоҳ Таолога дуо қилиб, уни муваффақиятсизликка учратишини ва унинг ҳам, бошқа барча Ислом ва мусулмонлар душманларининг ҳам макрини ўзларига қайтариб уришини сўраймиз.
