Россия Сурияга С-300 ракетага қарши мудофаа тизимини жойлаштирди
ОАВда Россияга тегишли ракетага қарши мудофаа тизимлари Сурияга жойлаштирилгани ҳақида хабарлар пайдо бўлди. Хабарларга кўра, бу қурол Американинг Сурияга уюштирадиган ҳар қандай ҳужумларига қарши тура олади.
С-300ВМ ракета зенит мажмуаси замонавий самолёт ва баллистик ракеталарнинг ҳужумини қайтара олишга мўлжалланган. Мажмуа ракеталари 250 километргача бўлган масофдаги нишонни уриб тушириши мумкин. Бундан ташқари кичик ракеталар рақиб самолёт ва қанотли ракеталарига қарши ишлатилиши мумкин.
Россиянинг бу ҳаракатига нисбатан АҚШ ўзининг салбий муносабатини билдирди. Оқ уй матбуот котиби Джош Эрнест берган баёнотида, “С-300 ракета зенит мажмуасини Сурияга жойлаштирилиши Москаванинг экстремистларга қарши кураш борасидаги баёнотларига зиддир. Чунки террорчилар авиацияга эга эмас”,- деди.
Унинг фикрича, бу каби хатти ҳаракатлар Россиянинг Сурияда бажарадиган вазифаларини шубҳа остига қўяди ва Россияга бўлган ишончни сусайтиради.
Ўз навбатида Россия ҳукумати С-300 ракета зенит тизими Россия ҳарбий денгиз кучларининг Тартусдаги базаси ва Россия ҳарбий кемаларини ҳимоя қилиш мақсадида Сурияга жойлаштирилганини маълум қилди.
Бу ҳақда мудофаа вазирлигининг расмий вакили Игор Конашенков баёнот берди. “Ҳақиқатан ҳам Сурияга С-300 зенит ракета тизимининг батереялари жойлаштирилди. Мазкур комплекс Тартусдаги ҳарбий денгиз базаси ва соҳил бўйидаги кемалар хавфсизлигини таъминлашга жалб қилинади”,- деди генерал.
У ўз сўзида, “Нима учун С-300 мажмуасини Сурияга юбориш борасидаги қароримизга ғарбдаги ҳамкорларимиз бунчалик ташвиш билдираётганига тушуна олмаяпмиз”,- деди.
“Эслатиб ўтаман, С-300 фақат мудофаа мақсадарига хизмат қилади ва ҳеч кимга ҳеч қандай хавф солмайди. Бундан ташқари ҳаммага маълумки, бундан аввал ҳам минтақада ҳудди шу каби “Форт” мажмуаси бор эди”,- дея ўз сўзига қўшимча қилди генерал.
Россия Федерация Кенгашининг мудофаа ва хавфсизлик қўмитаси раиси Виктор Озеров Россия ўз олдига қўйилган вазифаларни адо этиш йўлида Сурияга С-300 мажмуасини жойлаштиришга ҳақли эканини билдирди.
“Бу Туркия томонидан уриб туширилган бизнинг Су-24 самолёти билан боғлиқ ходиса такрорланмаслигининг олдини олади”,- деди Виктор Озеров.
Туркистон:
Россия билан АҚШнинг Сурияда манфаатлари бир бирига мос келмай қолди. АҚШ оламий системани, яъни халқаро сиёсий вазиятларни эътиборга олган ҳолда иш кўришга мажбур. Чунки у ҳозирча ягона оламий лидер, дунё етакчиси бўлиб турибди. Россия эса Сурияда тушунарсиз, мақсадсиз ва палапартиш ҳаракатлар олиб боряпти. Гўё унинг ҳаракатларида фақат Путин режимининг популистик мақсади ётгандек. Яъни рус халқи олдида, ўзини етакчи давлатлар билан жиддий рақобатдош қувватга эгадек кўрсатишни қасд қилаётганидек. Чунки айнан Путиннинг хатолари билан Россия сиёсий, иқтисодий ва ижтимоий инқироз ҳолатига келиб қолди.
АҚШ эса, Путинни режимини сақлаб қолиш учун ҳеч қандай ҳаракат қилмаяпти. Аксинча, АҚШнинг махфий розилиги остида Россиянинг Сурияда олиб борган қирғинбарот ҳаракатлари халқаро ҳамжамият томонидан ҳозирда оламий террор, деб баҳолана бошланди. Россиянинг ҳозирги иқтисодий аҳволи ҳам жуда ёмон. Захира жамғармаси деярли тугаяпти. Ишлаб чиқариш тармоғи деярли издан чиққан ва ўзининг ички истеъмолчиларини ҳам тўла қондира олмайди. Бу эса путинчи режимнинг бошқарувни эплай олмаганидан далолат қилади. Путинчилар жон-жаҳдлари билан бу ҳолатни ва унинг оқибатларини бирор бир иш чора билан ёпиб юборишга ҳаракат қилишяпти. Улар ички сиёсатда ватанпарварлик ва фидоийлик туйғуларни зўр бериб кучайтириб боришяпти. Ватанпарварлик эса, фақат уруш ва ташқи хавф хатарни кучайиши билан авж оладиган инсоний робита эканлиги боис, Путин Россияга бир неча томонда фронтлар очиб, уни уруш ҳолатига олиб келиб қўймоқда.
Путин урушни хоҳлаётгани йўқ, у мажбур бўлаяпти. Шунинг учун у ўзини ҳеч нарсадан тоймайдиган йиртқич қилиб кўрсатишга уринади. Негаки АҚШ ҳам Россия билан жиддий урушга киришишни хоҳламайди. АҚШ ҳеч ким билан урушишга интилган эмас. У урушни энг охирги ва заиф позициядаги мамлакатнинг иш ҳаракати деб баҳолайди. АҚШ бошқа мамлакатларни бир бирлари билан уруштириш йўли билан оламдаги барча муаммоларни ечишга интилади. Бундан ташқари Россия ҳам ядро қуролига эга бўлган мамлакат. Ядровий уруш бошлангудек бўлса, унда деярли бир томон ғолиб бўлмайди. Ҳар икки томон йўқ бўлиб кетиш хавфи бор.
Муаммо шундаки, АҚШ Сурияни бир неча минтақаларга бўлиб ташлаб, уларнинг ҳар бирини рози қилиш орқали вазиятни барқарорлаштирмоқчи бўлди. Россия эса, Сурияда фақат ҳозирги тан олинган Асад ҳокимияти ҳукумдор бўлиши керак, деган позицияни илгари суриб боряпти. Асад ҳокимияти фақат Россия учун ҳаво ҳудудидан фойдаланишга рухсат берган. Россия Сурия минтақасини ўзининг қонуний назорати остидаги ҳудуд деб, у ерга ҳатто АҚШнинг ҳам киришига рухсат бермайман деяпти.
Россия Сурияни эплай олмайди, ҳатто унга ҳеч ким аралашмай, ёлғиз ўзига қўйиб берилганда ҳам. Бир пайтлар СССР Афғонистонда тинч аҳолини қириб юборганидек, Росссия ҳам Суриянинг тинч аҳолисини қириб боришдан ўзга ишга қодир эмас. Негаки Россияда халқаро сиёсатдан фойдалана олиш қуввати деярли йўқ бўлиб боряпти. Бу уруш Россия учун мақсадсиз, манфаатсиз ва тўла инқирозга олиб борувчи уруш бўлди. Путиннинг режимига эса, ўзоқ давом этадиган шунчаки уруш керак.