БМТ: Сурияда ҳарбий ғалабага эришиб бўлмайди
Суриядаги охирги вазият муҳокама қилинган швед телевизион каналининг ахборот дастурига телефон орқали Нью-Йоркдан иштирок этган БМТ Бош котибининг ўринбосари Ян Элиассон Сурияда ҳарбий ғалабага эришиш имкони йўқлигини таъкидлади. Бироқ шундай бўлсада, Элиассон БМТ Сурияга оид саъй-ҳаракатларини давом эттиришига урғу берди.
“Беш йил мобайнида бир тараф ғолиб келаман, деб ўйлади. Очиқ айтганда, бу (ҳарбий ҳаракат) иш бермади. Шубҳасиз, Сурияда ҳарбий ғалабага эришиш имкони йўқ. Сиёсий ечим топишга мажбурмиз”, деди БМТ вакили.
Элиассон Россия ва АҚШ ўртасида Сурия масаласидаги музокараларнинг тўхтатилишига баҳо берар экан, – “Биз катта омадсизликка дучор бўлдик. Модомики, АҚШ ва Россия келиша олмас экан, БМТ Хавфсизлик Кенгашида бирликка эришиш мумкин эмас”, “АҚШ ва Россия ўртасидаги Музокараларнинг тўхтатилиши катта ишончсизлик борлигининг аломатидир. Аммо биз саъй-ҳаракатларимизни давом эттиришимиз керак. БМТ саъй-ҳаракатларини давом эттиради, биз таслим бўлмаймиз”, дея қайд этди.
БМТнинг Суриядаги “тинчлик” саъй-ҳаракатлари муваффақият қозониши учун уч соҳада келишув тузилиши шартлигини билдирган Элиассон сўзини шундай давом эттирди: – “Бу соҳалардан бири Россия ва Қўшма Штатлар ўртасидаги келишув бўлса, иккинчиси Саудия Арабистони, Туркия ва Эрон каби минтақадаги кучлар ўртасидаги келишувдир. Учинчиси эса Сурия режими ва мухолифат ўртасидаги келишувдир. Бу уч соҳаларнинг қайси бирида бўлмасин, ишончсизлик мавжуд бўлса жанг узоқ давом этадидиганга ўхшайди. Бу эса Сурия учун ҳам, минтақа ва бутун дунё учун ҳам катта фалокатдир”.