23-24 июн кунлари Тошкент шаҳрида Ўзбекистон президенти Ислом Каримов раислигида Шанхай ҳамкорлик ташкилотига аъзо давлат раҳбарлари Кенгашининг юбилей йиғилиши бўлиб ўтади.
Тадбир муносабати билан Ўзбекистон ташқи ишлар вазирилиги томонидан бугун брифинг ўтказилди. Унда саммитда ШҲТга аъзо давлатлардан, Қозоғистон президенти Нурсултон Назарбоев, Хитой Халқ Республикаси раиси Си Цзинпин, Қирғизистон президенти Алмазбек Атамбаев, Россия Федерацияси президенти Владимир Путин ва Тожикистон президенти Имомали Раҳмон иштирок этиши маълум қилинди.
Кузатувчи давлатлардан: Афғонистон президенти Ашраф Ғани, Беларусия президенти Александр Лукашенко, Мўғилистон президенти Цахиагийн Элбэгдорж, Покистон президенти Мамнун Хусейн, Ҳиндистон Бош вазири Нарендра Моди, Эрон ташқи ишлар вазири Муҳаммад Зариф ҳамда меҳмон давлат сифатида Туркманистон президенти Гурбангули Бердимуҳамедов иштирок этади.
Йиғилишда шунингдек, ШҲТ Бош котиби Рашид Алимов ва ШҲТ Минтақавий аксилтеррор тузилмаси ижроия қўмитаси директори Евгений Сысоев қатнашади.
Шу билан бирга, Саммитда ШҲТнинг халқаро ҳамкор ташкилотларидан, БМТ Бош котиби ўринбосари Джефри Фелтман, МДҲ Ижроия қўмитаси раиси Сергей Лебедев, Коллектив хавфсизлик келишуви ташкилоти Бош котиби Николай Бордюжа, АСЕАН Бош котиби Ле Лыонг Минь ва Осиё ўзаро ҳамкорлик ва ишонч чоралари Йиғилиши Ижрочи директори Гун Цзяньвэй иштирок этади.
Ўзбекистон Республикаси ташқи ишлар вазири ўринбосари Анвар Насировнинг маълум қилишича, ушбу тадбирда иштирок этиш учун Тошкентга ШҲТга аъзо давлатлар, халқаро ташкилотлар ва хориж ОАВдан қарийб 1000 нафар вакил ташриф буюради.
