Жорий йилнинг июн ойида Россия бюджетининг камомади 1.48 триллион рубл, яъни тахминан 22 миллиард долларга етганлиги эълон қилинди.
Россия Молия вазирлиги тарафидан берилган баёнотга кўра, 1 июндан эътиборан Россия бюджетининг камомади 1.48 триллион рубл етган бир пайтда, бюджет даромадлари 4.64 триллион рублга тушиб қолган бўлса, бюджет харажатлари эса 6,1 триллион рубл даражасига кўтарилган.
Ҳафта бошида берилган баёнотда айтилишича, мамлакатнинг Жорий йил январ-апрел ойлари оралиғидаги савдо салдоси (маълум вақт оралиғида суммадаги фарқ) ўтган йилнинг шу даврига нисбатан 48 фоизга камайиб, 33,2 миллиард долларга тушиб қолган.
Нефт нархларининг пасайиши туфайли иқтисодий инқироз билан юзлашган Россиянинг ялпи ички маҳсулоти ўтган йили 3,7 фоизга камайган эди.
