Исроилнинг Истанбулдаги бош консули Шай Коэн Исроил газини Туркия олқали дунёга олиб чиқиш энг яхши йўл эканлигини таъкидлади. Коэннинг билдиришича, тўрт миллиард доллар қийматидаги бу лойиҳани амалга ошириш учун хусусий сектор тайёр турибди.
“Исроил газини дунёга олиб чиқиш учун Туркия энг яхши ва энг қулай йўл, деган фикрга бутунлай қўшиламан. Геосиёсий нуқтаи назардан қаралганда энергия манбаларини шарқдан ғарбга, жанубдан шимолга ташиб ўтиш учун асосий гузаргоҳ вазифасини ўтовчи Туркия бўлмаса, энергия манбаларини диверсификациялаш жуда қийин бўлади”, “Фақат қувур ётқизиш, газ соҳасини кенгайтириш ва қувур Туркиянинг жанубий қирғоқларига етиб бориши учун билишимча, 4 миллиард доллар зарур бўлади. Бу эса инвесторлардан, қурилиш компанияларидан ва икки мамлакатдан жиддий мақсадда иш юритишни талаб қилади. Мен энг камида “бу мақсад хусусий секторда бор” деб айтишим мумкин. Чунки хусусий сектор тарафидан аллақачон барча чора тадбирлар кўриб қўйилган. Лойиҳаларни амалга ошириш учун фақат вақт масаласи қолди, холос”. “Геосиёсий сабабларга кўра, Исроил газининг катта қисми Туркия орқали четга олиб чиқилиши жуда муҳимдир”, деди Исроил бош консули.
Кейинги олинган хабарларга кўра, Туркия-Исроил ўртасидаги муносабатларда илиқлик кузатилмоқда. 2010 йилда юз берган Мовий Мармара ҳодисасидан сўнг Туркия-Исроил ўртасидаги муносабатлар таранглашгани айтилади. Бироқ сиёсий таҳлилчиларнинг даъво қилишича, таранглик фақат оғиздадир, амалда эса алоқалар ҳар доимгидек, ҳатто ҳар доимгидан ҳам яхшироқ давом этиб келмоқда.
Африка сафари олдидан аэропортда матбуот анжумани ташкил қилган Туркия президенти Ражаб Тоййиб Эрдуғон Туркия билан Исроил ўртасидаги муносабатларни яхшилаш учун ижобий қадамлар ташланганлигини билдирди.
“Ижобий ўзгаришлар борасида бир нуқтага келдик. Бизнинг талабимиз узр сўраш эди, у амалга ошди. Компенсация талаб қилдик, у ҳам бўлди. Учинчи талабимиз Ғазодан қамални олиб ташлаш эди. Ҳозирда Ғазода электр ва сув муаммоси мавжуд. Бу борада таклифлар киритдик. Ўзгаришлар ижобийга ўхшаб кўриняпти. Яна бошқа бир мавзу борки, мактаб ва шифохоналар қуришга рухсат беришса… Бундан ташқари озиқ-овқат ва дори-даримон борасида Туркия орқали келса қабул қиламиз, дейишяпти”, деди Туркия президенти.
