АҚШ ҳарбийлари ҳар қандай вақтда Ливияга кириши мумкин. Бу ҳақида АҚШ бош штаб бошқармасининг раҳбари Жозеф Данфорд Вашингтонда бўлиб ўтган АҚШ сенати ҳарбий ҳизматлар қўмитасининг йиғилишида маълум қилди. Данфорднинг таъкидлашича, Ливиядаги ҳолат тобора кескинлашиб бормоқда. Шу боис АҚШ махсус кучлари вазият талаб қилган ҳар қандай вақтда Ливияга киришга тайёр туришипти.
“Вашингтон Пост” газетасига интервю берган генерал Данфорд АҚШ ҳукуматининг миллий Ливия бирлик ҳукумати билан тинимсиз дипломатик алоқа олиб бораётганлигини билдирди. Данфордга кўра, АҚШ Ливияни ИШИД таҳдидидан қутқариш истагида шундай қилмоқда.
ИШИДнинг Ливияда ҳам фаолият олиб бораётганлиги ҳақидаги гап-сўзлар анча пайтдан буён давом этиб келади. Аслида эса нефтга бой Ливияни қўлдан бой беришни истамаган АҚШ ва Европа иттифоқи давлатлари ИШИДнинг мазкур минтақада тобора кучайиб бораётганини баҳона қилиб, ҳарбий аралашувга тайёргарлик кўрмоқда.
Ўтган ҳафта Римда ташкил қилинган “ИШИДга қарши кураш” саммитида иштирок этган АҚШ давлат котиби Жон Керри ИШИДни сохта Халифалик деб атаб, Ливиянинг миллиардлаб долларга тенг нефтга бой давлат эканлигига ишора қилиб ўтган эди.
