Нью-Йорк суди АҚШ ва Ўзбекистон расмийларининг илтимосига биноан Гулнора Каримова ишини тўхтатиб қўйди
Нью-Йорк Жанубий округи федерал суди Вашингтон ва Тошкетнинг илтимосига кўра Ўзбекистон президенти Ислом Каримовнинг тўнғич қизи Гулнора Каримова билан боғлиқ ишни кўриб чиқишни тўхтатиб қўйди. Икки мамлакат расмийлари коррупциявий схемалар текшируви доирасида музлатиб қўйилган юзлаб миллион доллар пулларнинг тақдири борасида суддан ташқари шароитларда келишиб олишни режалаштирганлар, дея хабар беради Eurasianet нашри.
Шу билан бирга, Eurasianet хабар беришича, суд қарорида “Америка Қўшма Штатлари ва Ўзбекистон Республикаси … [ишлар бўйича] суддан ташқари тартибда келишиб олиш имкониятларини муҳокама қилиб олишни истаяптилар ва шунинг учун ҳам суд ҳаракатларининг тўхтатиб қўйилиши ушбу муҳокамаларга қўл келади ҳамда томонлар ва суднинг пулларини тежалишига олиб келади”, деб айтилмоқда. Гап америка прокуратураси томонидан Швейцариядаги 300 млн доллар ва АҚШ, Ирландия, Люксембург ва Белгиядаги ҳисоб рақамларидаги 550 млн доллар, жами Гулнора Каримовага ва унинг хос одамларига қарашли 850 млн доллар музлатиб қўйилган пулларни мусодара қилиш ҳақида кетмоқда, дея изоҳ беради Eurasianet. Агар томонлар келиша олмасалар, унда АҚШдаги суд 2016 йил 31 июль куни иш текширувини қайтадан бошлаб юборади.
Эслатиб ўтамиз, Швейцария, АҚШ, Голландия, Швеция прокуратуралари 2012 йил кузидан бери телекоммуникация бозорларидаги Гулнора Каримова билан боғлиқ шубҳали битимларни текширувдан ўтказмоқдалар. Коррупция ва уюшган жиноятчилик устидан тадқиқот ўтказиш маркази (Organized Crime and Corruption Reporting Project, OCCRP) маълумотига кўра, Каримова кам деганда олтита телекоммуникация компаниялари билан муомалаларда коррупцияга оид схемалардан фойдаланиб келган. Унинг шартларига кўнган ширкатларга у Ўзбекистонда фаолият юритиш учун лицензия олишига ёрдам кўрсатган, ким унинг таклифларини рад этган бўлса, уларни йўқ қилган. Бунақангилар орасида учта Америка компаниялари ҳам бор эди.
2015 йил августида АҚШ ҳукумати Ирландия, Бельгия, Люксембург, Швеция ва Швейцария расмийларига мурожаат қилиб, Ўзбекистон телекоммуникация бозорида Vimpelcom, MTS ва TeliaSonera компаниялари иштирокидаги шубҳали битимларнинг текшируви доирасида умумий қиймати 1 млрд долларга тенг активларни ҳибсга олишни сўрагани ҳақида хабарлар берилганди. Ўзбекистон Адлия вазири Музраф Икромов 2016 йил январида Гулнора Каримова билан боғлиқ ишлар бўйича музлатиб қўйилган пулларни Ўзбекистонга топширишларини сўраганди. АҚШ Адлия вазирлиги жорий йилнинг апрелида Гулнора Каримовани пора олиш ва пул маблағларини ювишда гумонланувчи дея очиқ-ойдин билдирган эди.
Манба: “Фарғона” ахборот агентлиги
