“Sputnik” нашрига депутат Таабалди Тиллаевнинг хабар беришича, Балиқчи-Корумду автойўлини қайта таъмирлаш учун ўтказилган тендернинг қонунийлигини аниқлаш бўйича тузилган депутатлар комиссияси Жогорку Кенешга ҳукуматга ишончсизлик вотумини билдиришни тавсия қилди.
Унинг сўзларига кўра, комиссия бугун, 9 апрел куни йиғилиш ўтказди ва бир нечта қарорлар қабул қилди.
“Жогорку Кенешга ҳукуматга ишончсизлик билдириш тавсия қилинди. Сабаби, регламент бузилган, тендер вазирлик иштирокисиз ўтказилган. Ҳукумат раҳбари сифатида Темир Сариев қонун бузилиши учун шахсан жавобгар. Жогорку Кенеш ишончсизлик билдириш масаласини кейинги ҳафтада кўриб чиқади”,- деди Тиллаев.
Шунингдек, қўшимча тергов қилиш учун барча ҳужжатларни МХДҚ коррупцияга қарши кураш хизматига ўтказиб бериш тўғрисида қарор қабул қилинди.
Туркистон:
Қирғизистонда ҳар йили бош вазир алмаштириш “анъана”сига бу йил ҳам содиқ қолинадиган бўляпти. Ўтган йил май ойидан бошлаб бош вазирлик лавозимини эгаллаган Темир Сариев ҳам ўзга юклатилган вазифани адо этиб бўлгач, истеъфога кетиши аниқ бўлиб турипти. Қирғизистон “мустақиллик”ка эришганига 25 йил тўлаётган бўлса, шу вақт мобайнида 26та бош вазир алмашди, Темир Сариев ҳисоб бўйича 27-си эди.
Россия ҳохиш-истаги билан ҳукумат раҳбарлигига олиб келинган Темир Сариев халқ манфаатларига зид равишда, мамлакат бунга тайёр бўлмасада Қирғизистонни ЕОИИга олиб кирди. Бу иттифоқ президент ва ҳукумат кутганидек ижобий самара бермай, халқнинг турмуш тарзи кундан-кунга ночорлашиб бораётгани сабабли расмий ҳукумат ҳар доимгидек айбдорни, воз кечилиши керак бўлган шахсни қидириб қолди. Одатга кўра, бу шахс – Бош вазир бўлиши керак. Аввалги бош вазирлар ҳам давлат раҳбарларининг бирор-бир хатосини хаспўшлаш учун “қурбонликка келтирилган” бўлишсада, мансабдан бўшатилгач бошқа бир амал билан сийланишган ва шу билан ҳукуматнинг айблари ёпилиб кетаверади.
