25 январ куни Женевада бошланиши режалаштирилган Сурия масаласига оид музокаралар учун таклифномалар ҳали юборилмаган. Бу ҳақида Бирлашган Миллатлар Ташкилоти маълум қилди. “Анадоли” ахборот агентлигининг хабарига кўра, музокараларда мухолифат вакилларидан кимлар иштирок этиши масаласи ҳал қилинмаганлиги сабабли таклифномалар юборилиши тўхтаб турипти.
БМТ Бош котиби сўзчисининг ўринбосари Фарҳан Ҳақ журналистларга берган баёнотида Сурия масаласига оид музокаралар кечикиш мумкинлигига ишора қилди.
“Сурияни қўллаб-қувватлаш гуруҳи сафидаги етакчи давлатлар музокараларга чақириладиган мухолифат вакиллари устида келишиб олгандан сўнг БМТ тарафидан таклифномалар юборилади”, “Агар белгиланган кун борасида бирор ўзгартириш киритишга эҳтиёж туғилса, ўзимиз хабар қиламиз”, деди Фарҳан Ҳақ.
БМТ Хавфсизлик Кенгаши 18 декабрдаги йиғилишида ўт очишни тўхтатиш, ўтиш даври ҳукуматини ташкил этиш, янги конституция ва сайловлар ўтказиш ҳақидаги қарор лойиҳасини бир овоздан қабул қилган эди. Қарорда БМТ бошчилигида Сурия режими ва мухолифат вакиллари ўртасида сиёсий музокаралар бошланиши қайд этилган эди.
Сурияда қайси гуруҳлар террор ташкилоти сифатида эълон қилиниши ва қайсиниси қуролли мухолифат гуруҳлари сифатида қабул қилиниш мавзуси декабр ойида Нью-Йоркда ўтган йиғилишларда ўртага ташланган, бироқ ундан бирор натижа чиқмаган эди.
