Сўнги вақтларда Қирғизистондаги бирор сиёсатчи ёки жамоат арбоби ном чиқаришни, ўзини гўёки ишлаётгандек қилиб кўрсатишни хоҳлагудек бўлса, бунинг энг осон йўли сифатида Ислом дини ва унинг қадриятларига қарши фикр билдириши урф бўлиб бормоқда.
Президент Алмазбек Атамбаевнинг собиқ матбуот котиби, айни вақтда Жогорку Кенеш депутати Жанар Акаев (ҚСДП) Қирғизистонда бошқа хал қилиниши зарур бўлган муаммолар қуриб кетгандек, парламент биносида намозхона бўлишига қарши фикр билдириши билан дарҳол “таниқли арбоблар” сирасидан ўрин олди ва гўёки ўзини “халқ манфаатлари йўлида жон куйдираётган депутат сифатида намоён” қилди.
Бугунга келиб эса яна икки депутат Жанар Акаевдан “эстафета”ни қабул қилиб олишди.
Қирғизистоннинг собиқ бош прокурори, айни вақтда Жогорку Кенеш депутати Аида Салянова (Ата Мекен) ва унинг ҳамкасби Эльмира Жумалиева (Қирғизистон) расмий никоҳ қайди (ЗАГС)дан ўтмай туриб диний анъаналарга мувофиқ никоҳ ўқишни тақиқлаш ташаббусини кўтариб чиқишди. Улар томонидан ишлаб чиқилган қонун лойиҳаси жамоатчилик муҳокамасига тақдим қилинди.
“Оила кодекси” ва “Маъмурий жавобгарлик тўғрисидаги кодекс”га киритилган ўзгартиришлар никоҳ ва оила институтларини мустахкамлашга қаратилгани айтилмоқда. Қонун лойиҳасида расмий никоҳ қайди (ЗАГС)дан ўтмаган ва балоғат ёшига етмаганларни никоҳлаган диний хизматчилар (имомлар)ни жиноий жавобгарликка тортиш назарда тутилган.
Салянова ва Жумалиевалар расмий қайддан ўтмаганларни никоҳлаган диний хизматчиларни 3 йилга қадар, балоғат ёшига етмаганларни никоҳлаганларни эса 3 йилдан 5 йилгача озодликдан маҳрум этиш билан жазолашни таклиф қилишмоқда.