Россия ва Эрон билан бир қаторда Америка қўшма штатлари ҳам Асад режими билан доимий алоқа ўрнатиб келган. Бу ҳақида “Wall Street Journal” газетаси хабар тарқатди. Газетага кўра, АҚШ ва Сурия ўртасидаги алоқалар инқилоб бошланган 2011 йилдан ҳозирги кунга қадар узлуксиз давом этиб келган.
“Wall Street Journal” газетаси бу ҳақида ҳисобот ҳам эълон қилди. Ҳисоботда айтилишича, Сурия инқирози бошланган 2011 йилдан буён Обама идораси Асад режими билан дипломатик каналлар орқали тинимсиз хабарлашиб турган.
Шунингдек ҳисоботда Америка Қўшма Штатлари Сурияда ички низолар сабабли авваламбор Сурия ҳукуматини ўзгартириш учун инқилобчи генерал излашга тушганлиги, аммо излаганига эриша олмагач, Асад режими билан махфий учрашув ўтказа бошлаганлиги ҳақида ҳам айтиб ўтилади.
Бироқ, Обама маъмурияти Сурия инқирози даврида Асад режимини расман тан олмаслигини билдириб келди. Ҳатто 2013 йилда мухолифат гуруҳларни Суриянинг вакили сифатида тан олганини ҳам эълон қилган эди.
АҚШнинг Асад билан алоқани узмаганлиги ҳақидаги даъволар жамоатчиликда акс муносабат пайдо қилди. АҚШ матбуотида Обама маъмуриятининг бир бирига зид ташқи сиёсати Сурия урушининг яна ҳам узайишига сабаб бўлганлиги билан изоҳланмоқда.