АҚШ Президенти Барак Обама Туркия президенти Ражаб Таййиб Эрдуғон билан Франция пойтахти Париж шаҳрида ташкил қилинган иқлим ўзгариши саммитида учрашди. Учрашув тахминан бир соат давом этди.
Учрашувдан сўнг матбуот вакилларига баёнот берган Обама Россия ва Туркия ўртасидаги кескинликда Туркиянинг ёнида эканлигига ишора қилиб ўтди. Турк ҳаво сарҳадларини бузган Россия самолётининг уриб туширилиши ҳодисасига тўхталган Обама Турк ҳукумати ўз ҳаво ҳудудини ҳимоя қилиш ҳуқуқига эга эканлигига урғу берди.
“АҚШ Туркиянинг чегараларини ва ҳаво сарҳадларини ҳимоя қилиш ҳуқуқига эга эканлигини ҳар доим тан олган. Биз Туркиянинг ўз ҳаво ҳудудини ҳимоя қилиш ҳуқуқига эга эканлигини қўллаб-қувватлаймиз”, деди АҚШ Президенти.
Эрдуғон билан Туркия-Россия ўртасидаги кескинликни камайтириш масаласи ҳақида ҳам гаплашиб олганлигини айтиб ўтган Обама муаммоларни дипломатик ва сиёсий воситалар орқали ҳал этилиши лозимлигини билдирди. Обамага кўра, Россия ва Туркия ўзаро кучларини бирлаштириб минтақадаги умумий душманга қарши курашишлари лозим.
“Туркия билан Россия ўртасидаги тарангликни камайтириш учун биргаликда қандай ҳаракат қилиш кераклигини муҳокама қилдик”, “Туркия ва Россия ўртасидаги тарангликни кучайиши йўл қўйиб бўлмайди”, “Биз таранглик кучайишини истамаймиз”, “Бизнинг мақсадимиз коалиция кучлари билан биргаликда умумий душманимиз бўлган ИШИДни тўхтатишдир. Туркия бу борада ҳар доим бизни қўллаб-қувватлаб келмоқда”, деди Обама.
Обамадан сўнг сўзга чиққан Эрдоған Туркия-Россия муносабатлари ҳақида сўзлаб “Биз ҳам нотинчликни истамаймиз. Аксинча, бизнинг мақсадимиз минтақада тинчликни юзага келтириш учун ҳисса қўшишдир ва дипломатик шаклда натижага эришишдир. Зеро минтақадаги кескинлик бизни ҳам қайғуга солди”, деди.
