АҚШнинг икки сенатори Жон Маккейн билан Линдсей Граҳам Ироқ ва Сурия давлатларининг ҳар бири учун ўн мингдан аскар юбориш кераклигини таъкидлади. Икки сенаторга кўра, коалицияга аъзо давлатлардан йиғиладиган аскарларни қўшганда бу рақам юз мингга етиши лозим. Сенаторлар Ироқдаги АҚШ ҳарбий вужудини уч баробарга кўпайриб, ўн мингтага етказилиши ва бу аскарлар халқаро қўшинларнинг бир қисми сифатида қуруқликдан Сурияга юборилишини талаб қилди.
Республикачилар партиясининг кўзга кўринган Сенаторларидан бўлган Маккейн ва Граҳам АҚШ президенти Барак Обаманинг Ироқ ва Сурияда ИШИДга қарши ҳаво ҳужумларини ва маҳаллий кучлардан ташкил топган қуруқлик кучлари орқали юритаётган “кураш” стратегиясини танқид қилди. Республикачилар партиясидан президентликка ўз номзодини қўйган Граҳам ИШИДни йўқ қилишнинг ягона йўли қуруқлик кучларини ташкил қилиш эканлигига урғу бериб, “ҳаво ҳужумларидан бирор натижа чиқмаяпти”, дея эътироз билдирди.
АҚШ Сенатининг Қуролли Хизматлар қўмитасининг раҳбари Жон Маккейн ҳам ўн минг АҚШ ҳарбий маслаҳатчиси ва мураббийлари томонидан қўллаб-қувватланган Европа ва Араб кучларининг Сурияга қуруқликдан ҳужум уюштириши лозимлигини илгари сурди. Граҳам билан биргаликда Бағдодга ташриф буюрган Маккейннинг билдиришича, Туркия, Миср ва Саудия Арабистони каби давлатлар аскарлари иштирокида юз минг ҳарбийдан ташкил топган бу иттифоқни АҚШ давлати техник ёрдам ва разведка маълумотлари билан қўллаб-қувватлаб туради. Граҳамнинг айтишича эса, мазкур ҳарбий иттифоққа махсус кучлар ҳам қўшилиши мумкин.
