Туркия ва Исроил ўртасидаги тижорат ҳажми охирги беш йилда энг юқори даражага кўтарилди. Туркия статистика институти тарафидан ташқи сиёсат борасида олиб борилган тадқиқот натижасига кўра, Туркия ва Исроил ўртасидаги тижорат ҳажми сўнгги беш йилда икки баробарга ортиб 5,6 миллиард долларга етган. Бу рақам Исроиллик масъуллар тарафидан ҳам тасдиқланди.
Исроил ташқи ишлар вазирлигининг сўзчиси Эммануэль Нахсон “Media Line” дастурига берган баёнотида Туркия ва Исроил иқтисодиёти бир бирини тўлдирганлигини билдирди. Нахсонга кўра, икки давлат ўртасида тижорий алоқалар анча кучайган. Сўзчи Туркия ва Исроил ўртасида олиб борилаётган иқтисодий ва сиёсий алоқаларни бир биридан ажраган алоҳида-алоҳида алоқалар сифатида баҳолашга уринди.
“Аммо афсуслар бўлсинки, сиёсий алоқаларимиз унчалик яхши эмас. Сабаби Турк ҳукуматининг Исроилга нисбатан амалга оширган қўпол муомалаларидир”, деди Нахсон.
Эммануэль Нахсон Туркия ва Исроил ўртасидаги сиёсий алоқалар иқтисодий алоқалардан алоҳида юритилишидан мамнун эканлигини қўшимча қилди. Бу билан у иқтисодий алоқалар сиёсий алоқаларнинг маҳсули эканлигидан чалғитмоқчи бўлди.
Исроил ташқи ишлар вазирлигининг собиқ бош мудири Алон Лиэль ҳам мазкур икки давлат ўртасида дипломатик келишмовчиликлар тижорий алоқаларга таъсир қилмаслигини даъво қилди.
“Икки давлат ҳам ўзаро иқтисодий алоқалари ва сиёсий алоқалари ўртасида девор пайдо қилган эди. Ҳар икки давлатнинг ҳам иқтисодиёти ва эҳтиёжлари мавжуд. Улар дипломатик даражада шиддатли талаш тортиш қилишига қарамай, бунинг тижоратга ҳеч қандай таъсири йўқ”, деди Алон Лиэль.
